ປະເທດຊິມບັບເວແມ່ນບ້ານຂອງຊ້າງຫຼາຍກວ່າ 84,000 ໂຕ ແລະ ເປັນປະເທດທີ່ມີຈໍານວນປະຊາກອນຊ້າງຫຼາຍເປັນອັນດັບ 2 ຂອງໂລກຮອງຈາກ ປະເທດບອດສະວານາ. ລັດຖະມົນຕີກະຊວງສິ່ງແວດລ້ອມຂອງປະເທດຊິມບັບເວໄດ້ລາຍງານວ່າ ຊິມບັບເວມີຊ້າງຫຼາຍກວ່າທີ່ປ່າສາມາດຮອງຮັບໄດ້ ແລະ ການທີ່ມີຊ້າງຫຼາຍກວ່າຄວາມຕ້ອງການແມ່ນກໍໃຫ້ເກີດການຂາດແຄນຊັບພະຍາກອນສໍາລັບການດໍາລົງຊີວິດ. ເມື່ອມີຈໍານວນຊ້າງຫຼາຍເກີນໄປໃນອຸທິຍານແຫ່ງຊາດ ຫຼື ປ່າ ສົ່ງຜົນໃຫ້ຊ້າງອອກຈາກພື້ນທີ່ປ່າໄປສູ່ບ້ານເຮືອນປະຊາຊົນ ເຊິ່ງກໍໃຫ້ເກີດຂໍ້ຂັດແຍ່ງລະຫວ່າງມະນຸດກັບຊ້າງ. ໃນປີນີ້ມີປະຊາຊົນຫຼາຍກວ່າ 31 ຄົນເສຍຊີວິດຈາກຂໍ້ຂັດແຍ່ງດັ່ງກ່າວ.
ປະເທດຊິມບັບເວບໍ່ແມ່ນປະເທດທໍາອິດທີ່ຂ້າຊ້າງເພື່ອແຈກຢາຍຊີ້ນໃຫ້ແກ່ປະຊາຊົນ ເພາະໃນເດືອນສິງຫາ 2024 ທີ່ຜ່ານມາປະເທດນາມິເບຍ (ປະເທດເພື່ອນບ້ານຂອງປະເທດຊິມບັບເວ) ກໍໄດ້ຂ້າຊ້າງຈໍານວນ 83 ໂຕ ແລະ ສັດປ່າອື່ນໆອີກຈໍານວນ 640 ໂຕ ແຈກຢາຍໃຫ້ປະຊາຊົນເພື່ອບັນເທົາຄວາມອຶດຫິວ. ເຈົ້າໜ້າທີ່ຂອງປະເທດຊິມບັບເວຍັງໄດ້ຍືນຍັນອີກວ່າ ການກໍາຈັດຊ້າງໃນປະຈຸບັນແມ່ນບໍ່ພຽງແຕ່ເປັນມາດຕະການຫຼຸດຜ່ອນຄວາມອຶດຫິວເທົ່ານັ້ນ ແຕ່ຍັງເປັນວິທີຫຼຸດຜ່ອນຂໍ້ຂັດແຍ່ງລະຫວ່າງຄົນກັບຊ້າງທີ່ກໍາລັງທະວີຄວາມຮຸນແຮງຂຶ້ນເລື້ອຍໆ.
ເຖິງຢ່າງໃດກໍຕາມ, ການຂ້າຊ້າງເພື່ອແຈກຢາຍໃຫ້ປະຊາຊົນແມ່ນໄດ້ຮັບການຕໍ່ຕ້ານຈາກນັກອະນຸລັກ ແລະ ກຸ່ມສິດທິຂອງສັດ. Farai Maguwu, ຜູ້ອໍານວຍການສູນກໍາກັບດູແລຊັບພະຍາກອນທໍາມະຊາດໃນປະເທດຊິມບັບເວ, ໄດ້ປະນາມການຂ້າຊ້າງຄັ້ງນີ້ພ້ອມໃຫ້ເຫດຜົນວ່າ ຊ້າງມີສິດໃນການມີຊີວິດຢູ່ ແລະ ຄວນໄດ້ຮັບການອະນຸລັກໄວ້ສໍາລັບຄົນຮຸ່ນຕໍ່ໄປ. ນອກຈາກນີ້, Keith Lindsay, ນັກຊີວະວິທະຍາດ້ານການອະນຸລັກສິ່ງແວດລ້ອມ, ໄດ້ອອກມາສະແດງເຖິງຄວາມກັງວົນວ່າ ການແກ້ໄຂ້ບັນຫາຄວາມອຶດຫິວໂດຍການຂ້າສັດປ່າອາດຈະສ້າງຄວາມບໍ່ຍືນຍົງ ເພາະຈະກໍ່ໃຫ້ເກີດຄວາມຕ້ອງການຊີ້ນຂອງສັດປ່າຫຼາຍຂຶ້ນໃນອະນາຄົດ.
#econewslaos#climatechange#globalwarmingisreal#GlobalBoiling#zimbabweplantocullelephants#drought
ແຫຼ່ງຂໍ້ມູນອ້າງອີງ:
