ພາຍໃນງານແມ່ນຮ່ວມກັນພັດທະນາວິທີແກ້ໄຂສຳລັບຄວາມທ້າທາຍທີ່ຍິ່ງໃຫຍ່ທີ່ສຸດໃນໂລກທີ່ກ່ຽວຂ້ອງກັບນ້ຳ ໂດຍມີຫົວຂໍ້ຕັ້ງແຕ່ຄວາມໝັ້ນຄົງທາງດ້ານອາຫານ ແລະ ສຸຂະພາບ ໄປຈົນເຖິງກະສິກຳ, ເຕັກໂນໂລຊີ, ຄວາມຫຼາກຫຼາຍທາງຊີວະພາບ ແລະ ວິກິດການດ້ານສະພາບພູມມິອາກາດ.
ສັບປະດານໍ້າໂລກ 2024 (World Water Week 2024) ໄດ້ຈັດຂຶ້ນທັງແບບອອນລາຍ ແລະ ທີ່ ນະຄອນຫຼວງສະຕັອກໂຮມ, ປະເທດສະວີເດັນ ລະຫວ່າງວັນທີ່ 25-29 ສິງຫາ 2024 ໂດຍ Stockholm International Water Institute (SIWI). ງານດັ່ງກ່າວເປັນການປະຊຸມຊັ້ນນຳດ້ານນ້ຳລະດັບໂລກທີ່ສົ່ງເສີມຄວາມຮ່ວມມືລະຫວ່າງພາກສ່ວນທີ່ກ່ຽວຂ້ອງ ແລະ ຂອບເຂດປະເທດ.
ຫົວຂໍ້ຂອງສັບປະດານ້ຳໂລກປະຈຳປີ 2024 ແມ່ນ ການເຊື່ອມໂຍງຂ້າມພົມແດນ: ຊັບພະຍາກອນນ້ຳເພື່ອອານາຄົດທີ່ສະຫງົບສຸກ ແລະ ຄວາມຍືນຍົງ (Bridging borders: Water for a Peaceful and Sustainable Future) ມຸ່ງເນັ້ນໃສ່ຄວາມຮ່ວມມືດ້ານນໍ້າເພື່ອສັນຕິພາບ ແລະ ຄວາມໝັ້ນຄົງ ໂດຍຕ້ອງຄຳນຶງເຖິງການເຊື່ອມໂຍງລະຫວ່າງຊຸມຊົນ ແລະ ປະເທດໃນລະດັບພາກພື້ນ ແລະ ລະດັບໂລກ ເພື່ອຫາແນວທາງແກ້ໄຂບັນຫາທີ່ກ່ຽວຂ້ອງກັບນ້ຳຈົນກາຍເປັນກຸນແຈສຳຄັນໃນການບັນລຸເປົ້າໝາຍການພັດທະນາແບບຍືນຍົງ.
4 ປະເດັນຫຼັກ ທີ່ໜ້າສົນໃຈໃນປີນີ້ 1) ນໍ້າຂ້າມພົມແດນ ແລະ ການທູດ. ໃນຂົງເຂດການທູດທາງນ້ຳ, ບັນດາຂໍ້ສະເໜີໄດ້ຍົກເຖິງ 3 ປະການທີ່ສຳຄັນຫຼັກໆຄື: ປະການທີ (1) ແມ່ນເນັ້ນໜັກໃສ່ການສົ່ງເສີມຄວາມຮ່ວມມືດ້ານນ້ຳຂ້າມພົມແດນ ແລະ ແກ້ໄຂຂໍ້ຂັດແຍ່ງກ່ຽວກັບຊັບພະຍາກອນຮ່ວມກັນ, ປະການທີ (2) ເນັ້ນໃສ່ເຖິງແນວທາງການມີສ່ວນຮ່ວມ ແລະ ຂັບເຄື່ອນໂດຍຊຸມຊົນ, ປະການທີ (3) ມີການຊຸກຍູ້ໃຫ້ໃຊ້ປະໂຫຍດຈາກນະວັດຕະກຳ ແລະ ເຕັກໂນໂລຊີ. ແນວໂນ້ມເຫຼົ່ານີ້ເນັ້ນຍ້ຳເຖິງຄວາມພະຍາຍາມຢ່າງຄອບຄຸມໃນການແກ້ໄຂບັນຫາຄວາມຊັບຊ້ອນຂອງການຮັບຮອງຄວາມໝັ້ນຄົງ ແລະ ຄວາມຍືນຍົງຂອງນ້ຳທົ່ວໂລກ. 2) ລະບົບນິເວດ ແລະ ຄວາມຢືດຢຸ່ນຕໍ່ສະພາບພູມມິອາກາດ. ຂໍ້ສະເໜີກ່ຽວກັບລະບົບນິເວດ, ວິທີແກ້ໄຂທີ່ອີງໃສ່ທຳມະຊາດ, ສະພາບອາກາດ (ຄວາມຢືດຢຸ່ນ) ກວມເອົາຫຼາຍກວ່າຫົວຂໍ້ການແກ້ໄຂຄວາມໝັ້ນຄົງທາງນ້ໍາ, ການອະນຸລັກ, ການຈັດການໂດຍຜ່ານວິທີການປະດິດສ້າງ ແລະ ຄວາມພະຍາຍາມຮ່ວມມືກັນ. ຂໍ້ສະເໜີທີ່ຫຼາກຫຼາຍເຫຼົ່ານີ້ຊີ້ໃຫ້ເຫັນເຖິງຄວາມສຳຄັນຂອງຍຸດທະສາດລວມ ແລະ ການປະຕິບັດການຮ່ວມມືໃນການແກ້ໄຂສິ່ງທ້າທາຍທີ່ກ່ຽວຂ້ອງກັບນ້ຳ ແລະ ສົ່ງເສີມການຮັກສາສິ່ງແວດລ້ອມ. 3) ສິດທິມະນຸດ, ເພດ, ເຍົາວະຊົນ ແລະ ກຸ່ມຜູ້ດ້ອຍໂອກາດ. ສິດທິມະນຸດ, ເພດ, ເຍົາວະຊົນ ແລະ ກຸ່ມຜູ້ດ້ອຍໂອກາດ ສະທ້ອນໃຫ້ເຫັນເຖິງການຮັບຮູ້ຢ່າງກວ້າງຂວາງກ່ຽວກັບຄວາມສໍາຄັນຂອງການແກ້ໄຂບັນຫາກ່ຽວກັບນ້ໍາໃນບົດບາດຂອງສິດທິມະນຸດ, ການສ້າງຄວາມເຂັ້ມແຂງເຍົາວະຊົນ ແລະ ຄວາມຍຸຕິທໍາທາງສັງຄົມ. ບັນຫາຄວາມສະເໝີພາບ ແລະ ການຮ່ວມມືກັນເປັນໜຶ່ງດຽວ ໂດຍເນັ້ນໃສ່ການຕອບສະໜອງຄວາມຕ້ອງການຂອງກຸ່ມຜູ້ດ້ອຍໂອກາດ, ລວມທັງແມ່ຍິງ, ເດັກ ແລະ ຊົນເຜົ່າພື້ນເມືອງ. ຂໍ້ສະເໜີເຫຼົ່ານີ້ເນັ້ນໜັກເຖິງຄວາມສຳຄັນຂອງຄວາມອ່ອນໄຫວທາງດ້ານວັດທະນະທຳ, ການສ້າງຄວາມເຂັ້ມແຂງ ແລະ ຄວາມຍືນຍົງໃນໄລຍະຍາວໃນການບັນລຸຄວາມໝັ້ນຄົງທາງນ້ຳ ແລະ ສິດທິມະນຸດສຳລັບທຸກຄົນ. 4) ນໍ້າ, ສຸຂາພິບານ ແລະ ສຸຂະອະນາໄມ. ຂໍ້ສະເໜີນີ້ ກວມເອົາຫົວຂໍ້ຫຼາຍໆຢ່າງທີ່ກ່ຽວຂ້ອງກັບສິ່ງທ້າທາຍດ້ານນໍ້າ, ສຸຂາພິບານ, ສຸຂະອະນາໄມ ແລະ ຍັງແນ່ໃສ່ພາກພື້ນເຊັ່ນ: ອາຟຣິກາຕາເວັນອອກ, ອາຊີໃຕ້, ອາຊີຕາເວັນອອກ, (ລວມທັງອາຊີຕາເວັນອອກສຽງໃຕ້), ໂອເຊຍເນຍ, ອາຟຣິກາເໜືອ, ອາຟຣິກາຕາເວັນຕົກ ແລະ ອາເມລິກາກາງ. ໃນຂໍ້ສະເໜີເຫຼົ່ານີ້ມີຕັ້ງແຕ່ການສ້າງຕະຫຼາດທີ່ຍືນຍົງສໍາລັບຜະລິດຕະພັນ ໄປຈົນເຖິງການໃຫ້ບໍລິການນໍ້າ, ສຸຂາພິບານ ແລະ ສຸຂະອະນາໄມ ທີ່ທົນທານຕໍ່ສະພາບອາກາດໃນສະຖານະການວິກິດການທີ່ຍືດເຍື້ອ ເພື່ອແກ້ໄຂຄວາມຂັດແຍ່ງກັນກ່ຽວກັບແຫຼ່ງນ້ຳ, ການສົ່ງເສີມການແກ້ໄຂບັນຫາທີ່ນຳໂດຍຊຸມຊົນສຳລັບການຈັດການນ້ຳ ແລະ ສຸຂະອະນາໄມ.
ແຫຼ່ງຂໍ້ມູນອ້າງອີງ:
#econewslaos #worldwaterweek2024
