ຂໍ້ມູນຈາກການວິເຄາະຂອງ World Economic Forum ວ່າຕົ້ນທຶນອາດຕໍ່າກວ່າ 1 ໂດລາສະຫະລັດຕໍ່ກິໂລກຣາມ ເຊິ່ງຖືກກວ່າຂະບວນການຜະລິດໄຮໂດຣເຈນແບບອື່ນເຖິງ 10 ເທົ່າ. ຄວາມຕ້ອງການໃນທົ່ວໂລກສຳລັບໄຮໂດຣເຈນກາກບອນຕ່ຳຄາດວ່າຈະສູງເຖິງ 200 ລ້ານໂຕນຕໍ່ປີພາຍໃນປີ 2050. ໃນຂະນະທີ່ອຸດສາຫະກໍາໄຮໂດຣເຈນທົ່ວໂລກຜະເຊີນກັບສິ່ງທ້າທາຍທາງດ້ານການເງິນ ແລະ ຄວາມຕ້ອງການ. ດັ່ງນັ້ນ, ຫຼາຍພາກສ່ວນຈຶ່ງເຫັນໄຮໂດຣເຈນສີຂາວທີ່ເປັນທາງເລືອກທີ່ມີປະສິດທິພາບຫຼາຍຂຶ້ນ.
ຕົວຢ່າງສໍາຄັນທີ່ເປັນຈຸດເລີ່ມຕົ້ນຂອງຄວາມສົນໃຈໄຮໂດຣເຈນສີຂາວ ຄືການຄົ້ນພົບແຫຼ່ງໄຮໂດຣເຈນສີຂາວຂະໜາດໃຫຍ່ໃນອາຟຣິກາຕາເວັນຕົກ ເຊິ່ງສາມາດສະໜອງພະລັງງານໃຫ້ກັບຊຸມຊົນທີ່ຢູ່ນອກລະບົບໄຟຟ້າໄດ້ສຳເລັດ ແລະ ໃນຊ່ວງຫຼັງມີການສຳຫຼວດເພີ່ມເຕີມທີ່ປະເທດຝຣັ່ງ. ໂດຍພົບແຫຼ່ງກັກເກັບໄຮໂດຣເຈນມະຫາສານ ແລະ ມີຄວາມເປັນໄປໄດ້ທີ່ຈະໃຊ້ໃນການຜະລິດພະລັງງານໄດ້ເປັນເວລາຫຼາຍທົດສະວັດ.
ເຖິງແມ່ນວ່າອຸດສາຫະກໍາໄຮໂດເຈນສີຂາວຍັງຢູ່ໃນຊ່ວງເລີ່ມຕົ້ນ ແຕ່ຜູ້ຊ່ຽວຊານຫຼາຍຄົນເຊື່ອວ່າມັນຈະເປັນຈຸດປ່ຽນຂອງການຜະລິດພະລັງງານສະອາດໃນອະນາຄົດ. ໂດຍສະເພາະໃນອຸດສາຫະກໍາຫນັກເຊັ່ນ: ການບິນ, ການຂົນສົ່ງທາງທະເລ ແລະ ອຸດສາຫະກໍາການຜະລິດເຫຼັກ. ນອກຈາກນີ້, ໄຮໂດຣເຈນຍັງຖືວ່າເປັນທາງເລືອກທີ່ມີສັກກະຍະພາບໃນການຫຼຸດຜ່ອນການປ່ອຍອາຍກາສພິດເຮືອນແກ້ວ ເຊິ່ງເປັນເປົ້າໝາຍສຳຄັນຂອງຫຼາຍປະເທດໃນການປ່ຽນແປງສູ່ເສດຖະກິດກາກບອນຕ່ຳ.
ການລົງທຶນ ແລະ ການວິໄຈເພີ່ມເຕີມໃນດ້ານນີ້ມີແນວໂນ້ມທີ່ຈະເຮັດໃຫ້ໄຮໂດຣເຈນສີຂາວມີບົດບາດສໍາຄັນໃນອະນາຄົດ. ໃນຂະນະທີ່ບໍລິສັດນ້ໍາມັນ ແລະ ອາຍກາສທໍາມະຊາດກໍາລັງເຂົ້າມາມີສ່ວນຮ່ວມໃນຂະບວນການສຳຫຼວດແຫຼ່ງພະລັງງານໃໝ່ນີ້, ການພັດທະນານະໂຍບາຍສະຫນັບສະຫນູນ ແລະ ການຈັດເກັບໄຮໂດຣເຈນໃຕ້ດິນກໍຈະເປັນປັດໄຈສຳຄັນທີ່ຊ່ວຍຂັບເຄື່ອນອຸດສາຫະກໍາໄຮໂດຣເຈນສີຂາວຕໍ່ໄປໃນອະນາຄົດ.
#econewslaos
ແຫຼ່ງຂໍ້ມູນອ້າງອີງ:
