ຈາກຂໍ້ມູນ Environmental Protection Agency (EPA) ທິດຊູ່ປຽກທົ່ວໄປເຮັດຈາກປລາສຕິກ ຫຼື ເສັ້ນໄຍສັງເຄາະນັ້ນໃຊ້ເວລາດົນນານເຖິງ 100 ປີ ຫຼື ຫຼາຍກວ່ານັ້ນໃນການຍ່ອຍສະຫຼາຍ. ເນື່ອງຈາກວັດສະດຸເຫຼົ່ານີ້ຍ່ອຍສະຫຼາຍໄດ້ຍາກເມື່ອຖິ້ມລົງໃນສິ່ງແວດລ້ອມທໍາມະຊາດ. ທິດຊູ່ປຽກເຫຼົ່ານີ້ບໍ່ສາມາດຍ່ອຍສະຫຼາຍໄດ້ເຕັມທີ່ ອາດກາຍເປັນໄມໂຄຣປລາສຕິກ (Microplastics) ເຊິ່ງເປັນອະນຸພາກປລາສຕິກຂະໜາດນ້ອຍທີ່ປົນເປື້ອນໃນນ້ຳ ແລະ ດິນ ເຮັດໃຫ້ເປັນອັນຕະລາຍຕໍ່ສັດນ້ຳ ແລະ ລະບົບນິເວດໂດຍລວມ.
ໃນຊ່ວງຫຼາຍປີທີ່ຜ່ານມາມີການພັດທະນາ ແລະ ໄດ້ເປີດຕົວທິດຊູ່ປຽກທີ່ຍ່ອຍສະຫຼາຍໄດ້ທາງຊີວະພາບ (biodegradable wipes) ຈາກແຕ່ລະບໍລິສັດເຊັ່ນ: WaterWipes ຈາກປະເທດໄອແລນ (Ireland), Seventh Generation ຈາກປະເທດສະຫະລັດອາເມຣິກາ (USA), Natracare ຈາກປະເທດອັງກິດ (UK), The Honest Company ຈາກປະເທດສະຫະລັດອາເມຣິກາ (USA), Eco by Naty ຈາກປະເທດສະວີເດັນ (Sweden).
ບໍລິສັດເຫຼົ່ານີ້ເປັນພຽງສ່ວນໜຶ່ງຂອງຜູ້ຜະລິດທີ່ມີຄວາມຮັບຜິດຊອບຕໍ່ສິ່ງແວດລ້ອມ ໂດຍມຸ່ງເນັ້ນທີ່ການຫຼຸດຜ່ອນຜົນກະທົບຕໍ່ສິ່ງແວດລ້ອມ ແລະ ເພື່ອຕອບສະໜອງຕໍ່ຄວາມຕ້ອງການຂອງຜູ້ບໍລິໂພກທີ່ໃສ່ໃຈເລື່ອງສິ່ງແວດລ້ອມ. ທິດຊູ່ປຽກ ທີ່ຍ່ອຍສະຫຼາຍໄດ້ທາງຊີວະພາບ (biodegradable wipes) ເຊິ່ງສາມາດຍ່ອຍສະຫຼາຍໄດ້ໃນເວລາທີ່ສັ້ນກວ່າ ໂດຍອາດໃຊ້ເວລາພຽງເດືອນເຖິງປີຂຶ້ນຢູ່ກັບສະພາບແວດລ້ອມທີ່ ທິດຊູ່ປຽກ ຖືກຖິ້ມເຊັ່ນ: ອຸນຫະພູມ, ຄວາມຊຸ່ມ ແລະ ແສງແດດ ເຊິ່ງຖືວ່າເປັນບາດກ້າວສຳຄັນໃນການຫຼຸດຜ່ອນຜົນກະທົບຕໍ່ສິ່ງແວດລ້ອມ.
ເຖິງວ່າຜະລິດຕະພັນ ທິດຊູ່ປຽກ ທີ່ຍ່ອຍສະຫຼາຍໄດ້ທາງຊີວະພາບຈະເປັນຕົວເລືອກທີ່ດີກວ່າ ແຕ່ການໃຊ້ງານໃນປະລິມານຫຼາຍຍັງຄົງສົ່ງຜົນກະທົບຕໍ່ສິ່ງແວດລ້ອມ. ການຫຼຸດຜ່ອນການໃຊ້ ແລະ ເລືອກໃຊ້ຜະລິດຕະພັນທີ່ເປັນມິດກັບສິ່ງແວດລ້ອມ ຈຶ່ງເປັນສິ່ງທີ່ຄວນໄດ້ຮັບການສົ່ງເສີມເພື່ອຮັກສາສົມດຸນຂອງລະບົບນິເວດ ແລະ ປົກປັກຮັກສາໂລກສຳລັບຄົນລຸ້ນຕໍ່ໄປ.
ແຫຼ່ງຂໍ້ມູນອ້າງອີງ:
#econews #econewslaos #environmentalawareness
