ເມື່ອສະໜາມຂີ້ເຫຍື້ອບໍ່ສາມາດຮອງຮັບປະລິມານຂອງຂີ້ເຫຍື້ອທີ່ເຫຼືອໄດ້ເຮົາຈະເຮັດແນວໃດ?
ອີງຕາມສະຖິຕິຈາກ Environmental Protection Agency ຫຼື EPA ໃນປີ 2018, ປະມານ 146 ລ້ານໂຕນຂອງຂີ້ເຫຍື້ອໃນຂອບເຂດເທດສະບານຢູ່ສະຫະລັດອາເມລິການັ້ນ ໄດ້ຖືກນໍາໄປຖິ້ມຢູ່ສະໜາມຂີ້ເຫຍື້ອ; ເຊິ່ງສ່ວນໃຫຍ່ຈະແມ່ນສິ່ງເສດເຫຼືອປະເພດອາຫານ ກວມເອົາປະມານ 24 ສ່ວນຮ້ອຍຂອງຈໍານວນທັງໝົດ. ສ່ວນປລາສຕິກແມ່ນ ກວມເອົາເຖິງ 18 ສ່ວນຮ້ອຍ, ຂີ້ເຫຍື້ອປະເພດເຈ້ຍ ແລະ ແກັດແມ່ນກວມເອົາປະມານ 12 ສ່ວນຮ້ອຍ, ປະເພດຢາງ, ໜັງ ແລະ ເນື້ອຜ້າ ກວມເອົາປະມານ 11 ສ່ວນຮ້ອຍ ແລະ ອີກ 10 ສ່ວນຮ້ອຍແມ່ນເປັນຂີ້ເຫຍື້ອປະເພດອື່ນໆ.
ກົນໄກຂອງການປ່ຽນວັດຖຸສິ່ງເສດເຫຼືອທີ່ບໍ່ສາມາດຣີໄຊເຄີລໄດ້ໃຫ້ກາຍເປັນພະລັງງານໄຟຟ້ານັ້ນ ແມ່ນຕ້ອງໄດ້ອາໄສຄວາມຮ້ອນທີ່ເຜົາໄໝ້ເສດຂີ້ເຫຍື້ອປະເພດເຈ້ຍ, ປລາສຕິກທີ່ບໍ່ສາມາດລີໄຊເຄີ້ລໄດ້, ແລະ ອື່ນໆ ແລ້ວຜັນປ່ຽນພະລັງງານດັ່ງກ່າວໃຫ້ກາຍເປັນພະລັງງານໄຟຟ້າ. ວິທີນີ້ແມ່ນການສ້າງພະລັງງານສະອາດເພື່ອຫຼຸດຜ່ອນການປ່ອຍອາຍຄາບອນ ທີ່ໄດ້ມາຈາກການເຜົາຜານພະລັງງານແບບວິທີດັ້ງເດີມ ແລະ ເພື່ອຫຼຸດຜ່ອນການຜະລິດ methane ຈາກສະໜາມຂີ້ເຫຍື້ອ. ຄວັນທີ່ເກີດຈາກການເຜົາໄໝ້ຈະຖືກກັ່ນຕອງບໍ່ໃຫ້ປ່ອຍອອກສູ່ອາກາດ ແລະ ສ່ວນຂີ້ເຖົ່າອີກ 10 ສ່ວນຮ້ອຍທີ່ເຫຼືອຈາກການເຜົາໄໝ້ນັ້ນຈະຖືກສົ່ງໄປຖິ້ມລົງສະໜາມຂີ້ເຫຍື້ອ.
ການໝູນໃຊ້ສິ່ງເສດເຫຼືອໄປຜະລິດເປັນພະລັງງານໄຟຟ້ານັ້ນຖືເປັນທາງອອກທີ່ດີຕໍ່ບັນຫາສິ່ງແວດລ້ອມ ຫຼື ບໍ່?
ໜຶ່ງໃນຜົນປະໂຫຍດຂອງການຜັນປ່ຽນຂີ້ເຫຍື້ອໃຫ້ເປັນພະລັງງານທົດແທນນັ້ນ ແມ່ນຈະເປັນການຊ່ວຍຫຼຸດຜ່ອນການປ່ອຍອາຍພິດເຮືອນແກ້ວ. ເພາະເມື່ອສິ່ງເສດເຫຼືອຊີວະພາບຖືກປະຖິ້ມໄວ້ເພື່ອໃຫ້ຍ່ອຍສະຫຼາຍເອງໃນສະໜາມຂີ້ເຫຍື້ອ, ມັນກໍຈະມີການຜະລິດກາສເມຕານ ເຊິ່ງແມ່ນອາຍກາສເຮືອນແກ້ວທີ່ມີສ່ວນໃນການປ່ຽນແປງຂອງດິນຟ້າອາກາດ. ໂດຍມີຕົວຢ່າງຈາກບັນດາປະເທດທີ່ໄດ້ນໍາໃຊ້ວິທີການນີ້ໃນການຜະລິດພະລັງງານ ພ້ອມກັບແກ້ໄຂບັນຫາສະໜາມຂີ້ເຫຍື້ອເຫຼືອລົ້ນ.
ຕົວຢ່າງຂອງລັດທີ່ນໍາໃຊ້ແຜນໂຄງການດັ່ງກ່າວ ແລະ ດໍາເນີນການໄດ້ສໍາເລັດ
ລັດຮາວາຍ ໄດ້ນໍາໃຊ້ແຜນໂຄງການປ່ຽນຂີ້ເຫຍື້ອໃຫ້ເປັນພະລັງງານ ທີ່ເອີ້ນວ່າ ໂຄງການໂຮໂນລູລູ (H-POWER) ຕັ້ງຢູ່ ເກາະ ໂອອາຮູ ລັດຮາວາຍ (Oahu, Hawaii). ໂດຍມີບໍິລິສັດຫຼັກຊື່ວ່າ Covanta ທີ່ມີໂຮງງານທີ່ດໍາເນີນການໂຄງການດັ່ງກ່າວຢູ່ປະມານ 20 ຈຸດໃນສະຫະລັດອາເມລິກາ ແລະ ແຄນນາກາ. ເພື່ອເປັນການຕອບສະຫນອງຄວາມຕ້ອງການໃນການຈັດການສິ່ງເສດເຫຼືອຂອງປະຊາຊົນທີ່ອາໄສຢູ່ເທິງເກາະ ເຖິງ 950,000 ຄົນ ແລະ ນັກທ່ອງທ່ຽວຫົກລ້ານຄົນຕໍ່ປີ ໃນລັກສະນະທີ່ຍືນຍົງ ແລະ ເປັນມິດຕໍ່ສິ່ງແວດລ້ອມທີ່ສຸດ. ໃນປີ 2012, H-POWER ໄດ້ດໍາເນີນການເພີ່ມປະລິມານຂີ້ເຫຍື້ອທີ່ຖືກເຜົາໃຫ້ເປັນ 900 ໂຕນຕໍ່ມື້ເພື່ອເພີ່ມກໍາລັງການຕອບສະຫນອງພະລັງງານໄຟຟ້າໃຫ້ກັບ 10 ສ່ວນຮ້ອຍຂອງເກາະ. ນັບຕັ້ງແຕ່ປີ 2009 ເຖິງ ປັດຈຸບັນ ໂຮໂນລູລູ ໄດ້ຫຼຸດຜ່ອນການປ່ອຍມົນລະພິດ ເຖິງ 50 ສ່ວນຮ້ອຍ ຈາກໂຮງງານ.
ແລ້ວຖ້າມີທາງເລືອກອື່ນເດ, ເຊັ່ນການຫຼຸດຜ່ອນປະລິມານຂີ້ເຫຍື້ອຕໍ່ຄົວເຮືອນລົງ ແມ່ນຈະເປັນທາງອອກທີ່ດີກວ່າບໍ່? ທ່ານຜູ້ອ່ານມີຄວາມຄິດເຫັນແນວໃດ? #econewslaos #wastemanagement #waste #energy
ທີ່ມາ:
