ໂຕແຮ້ງ (Vulture) ເປັນນົກທີ່ຖືກເບິ່ງຂ້າມ, ໄດ້ຮັບຊື່ສຽງໃນທາງລົບ ແລະ ຫຼາຍຄົນເຊື່ອວ່າແຮ້ງເປັນສັດທີ່ໂຫດຮ້າຍ, ສົກກະປົກ ແລະ ມີຮູບຮ່າງທີ່ຂີ້ຮ້າຍ ເພາະຄວາມເຊື່ອບາງວັດທະນະທຳທີ່ພວກມັນກ່ຽວຂ້ອງກັບຄວາມຕາຍ ແລະ ຄວາມໂລບມາກໂລພາ.
ມັນອາດກາຍເປັນພຽງຕໍານານໃນອະນາຄົດຂ້າງໜ້າ ເມື່ອສາຍພັນຂອງພວກມັນຫຼາຍຊະນິດກຳລັງປະເຊີນກັບວິກິດການສູນພັນ. ການຫາຍໄປຂອງແຮ້ງຈະບໍ່ພຽງແຕ່ເຮັດໃຫ້ລະບົບນິເວດເສຍສົມດູນ ແຕ່ຍັງສົ່ງຜົນກະທົບຕໍ່ສຸຂະພາບຂອງມະນຸດ ແລະ ສັດອື່ນໆ ອີກດ້ວຍ.
ໃນໄລຍະທົດສະວັດທີ່ຜ່ານມາ ປະຊາກອນແຮ້ງໄດ້ຫຼຸດລົງໃນທົ່ວໂລກ. ແຮ້ງໃນທະວີບອາຊີບາງສາຍພັນໄດ້ຫຼຸດລົງເຖິງ 99%. ນັບຕັ້ງແຕ່ປີ 1990-2000 ແລະ ແຮ້ງໃນທະວີບອາຟຣິກາໄດ້ຫຼຸດລົງເຖິງ 90% ຈາກການວາງຢາພິດເພື່ອເກັບກ່ຽວເອົາຊິ້ນສ່ວນຮ່າງກາຍຂອງແຮ້ງ ສໍາລັບການນໍາໄປໃຊ້ຕາມຄວາມເຊື່ອ ໂດຍມີແຮ້ງຢ່າງໜ້ອຍ 2,000 ໂຕຖືກວາງຢາພິດ ລະຫວ່າງເດືອນທັນວາ 2019 ຫາ ເດືອນມີນາ 2020 ຢູ່ທີ່ປະເທດກິນີ-ບິສເຊົາ (Guinea-Bissau). ສາເຫດສໍາຄັນທີ່ເຮັດໃຫ້ແຮ້ງຫຼາຍສາຍພັນມີຄວາມສ່ຽງຕໍ່ການສູນພັນແມ່ນການໃຊ້ຢາໄດໂຄລຟີແນກ (diclofenac) ເຊິ່ງເປັນພິດຮ້າຍແຮງຕໍ່ແຮ້ງ. ແຮ້ງທີ່ໄດ້ຮັບຢາຊະນິດນີ້ຈະເສຍຊີວິດຈາກການເປັນພິດທີ່ທຳລາຍຫມາກໄຂ່ຫລັງຂອງພວກມັນ. ນອກຈາກນີ້, ຍັງລວມເຖິງການສູນເສຍຖິ່ນທີ່ຢູ່ອາໄສ ແລະ ການຂາດແຄນອາຫານຍັງເປັນປັດໄຈເຮັດໃຫ້ແຮ້ງຫຼາຍຊະນິດສູນພັນຢ່າງໄວວາ.
ແຮ້ງເປັນຫນຶ່ງໃນສັດທີ່ມີບົດບາດສໍາຄັນໃນລະບົບນິເວດ ໂດຍສະເພາະໃນດ້ານການຄວບຄຸມປະລິມານຊາກສັດທີ່ເນົ່າເປື່ອຍ, ຍັງຊ່ວຍຫຼຸດຜ່ອນການແຜ່ກະຈາຍຂອງເຊື້ອພະຍາດທີ່ເປັນອັນຕະລາຍທັງມະນຸດ ແລະ ສັດ. ດັ່ງນັ້ນ, ການຫາຍໄປຂອງແຮ້ງຈຶ່ງເປັນສັນຍານເຕືອນວ່າທຳມະຊາດອາດຈະສູນເສຍສົມດຸນໄດ້. ຫຼາຍປະເທດທົ່ວໂລກ ລວມທັງອົງການອະນຸລັກສັດຕ່າງໆເຊັ່ນ: Saving Asia’s Vultures from Extinction (SAVE), The Peregrine Fund, BirdLife International, International Vulture Awareness Day, Wildlife Conservation Society (WCS) ເປັນຕົ້ນ. ອົງການເຫຼົ່ານີ້ກໍາລັງພະຍາຍາມຊ່ວຍເຫຼືອແຮ້ງຈາກວິກິດການສູນພັນ ໂດຍການຫ້າມໃຊ້ຢາໄດໂຄລຟີແນກ (diclofenac), ພ້ອມທັງຟື້ນຟູຖິ່ນທີ່ຢູ່ອາໄສ ແລະ ຈັດຫາພື້ນທີ່ຄຸ້ມຄອງບ່ອນຢູ່ທີ່ປອດໄພໃຫ້ກັບພວກມັນ.
ການສູນພັນຂອງແຮ້ງບໍ່ພຽງແຕ່ຈະສູນເສຍສັດຊະນິດໜຶ່ງໄປ, ແຕ່ຍັງເປັນການສູນເສຍຕົວຊ່ວຍທີ່ສໍາຄັນໃນທໍາມະຊາດ. ການເພີ່ມຄວາມຮັບຮູ້ກ່ຽວກັບຄວາມສຳຄັນຂອງແຮ້ງ ແລະ ສະໜັບສະໜູນການອະນຸລັກ ສາມາດຊ່ວຍປ້ອງກັນບໍ່ໃຫ້ແຮ້ງກາຍເປັນພຽງເລື່ອງເລົ່າໃນອະດີດ.
ແຫຼ່ງຂໍ້ມູນອ້າງອີງ:
#biodiversity #econewslaos #worldvultureday
