ສຳລັບສະຖານະການຂອງປະເທດຫວຽດນາມ, ໄຕ້ຝຸ່ນຢາກິໄດ້ເຄື່ອນກຳລັງເຂົ້າສູ່ຫວຽດນາມໃນເມື່ອວັນທີ 7 ກັນຍາ ເຊີ່ງກໍ່ໃຫ້ເກີດຝົນຕົກໜັກ ແລະ ນໍ້າຖ້ວມຢ່າງກະທັນຫັນ. ປະຊາຊົນຫຼາຍພັນຄົນໄດ້ອົບພະຍົບອອກຈາກເຂດໄພພິບັດ. ຈາກການລາຍງານຂອງສຳນັກຂ່າວ Reuters ພົບວ່າມີຍອດຜູ້ເສຍຊິວິດຈາກໄຕ້ຝຸ່ນດັ່ງກ່າວສູງເຖິງ 250 ກວ່າຄົນ ໃນເມື່ອວັນສຸກທີ່ຜ່ານມາ. ນອກຈາກນີ້,​ ປະຊາຊົນຫຼາຍກວ່າ 800 ຊິວິດໄດ້ຮັບບາດເຈັບ ແລະ ຄາດການວ່າຕົວເລກຜູ້ສູນຫາຍຍັງມີຫຼາຍກວ່າ 80 ຊິວິດ ແລະ ຍັງມີອີກຈຳນວນໜື່ງທີ່ຢູ່ໃນລະຫວ່າງການຄົ້ນຫາ.

ເຖິງແມ່ນວ່າໄຕ້ຝຸ່ນໄດ້ອ່ອນກຳລັງລົງ ແຕ່ທາງປະເທດ ມຽນມ້າ ກໍໄດ້ຮັບຜົນກະທົບບໍ່ຕ່າງຈາກປະເທດເພື່ອນບ້ານເຊັ່ນດຽວກັນ. ໂດຍທາງການຂອງປະເທດ ມຽນມ້າໄດ້ມີການລາຍງານຕົວເລກຜູ້ເສຍຊິວິດລ່າສຸດເມື່ອວັນເສົາທີ່ຜ່ານມາ ແມ່ນມີ 113 ຊິວິດ ແລະ ຍັງມີ 64 ຊິວິດທີ່ຍັງສູນຫາຍ. ບ້ານເຮືອນຂອງປະຊາຊົນ ຫຼາຍກວ່າ 60,000 ຫຼັງຄາເຮືອນ ແລະ ໂຮງຮຽນຫຼາຍກວ່າ 300 ຫຼັງໄດ້ຮັບຄວາມເສຍຫາຍ ພ້ອມນັ້ນ, ບັນດາເສັ້ນທາງ, ພື້ນຖານໂຄ່ງລ່າງຕ່າງໆກໍຍັງຖືກຕັດຂາດ.

ໃນສ່ວນຂອງປະເທດໄທ, ໂດຍສະເພາະແມ່ນທາງພາກເໜືອຂອງປະເທດ ໄດ້ພົບຜູ້ເສຍຊິວິດ ຈຳນວນ 9 ຄົນພາຍຫຼັງການພັດເຂົ້າຂອງພາຍຸຢາກິ. ໜື່ງໃນເຂດທີ່ໄດ້ຮັບຜົນກະທົບໃນທາງພາກເໜືອ ຄື ແຂວງຊຽງລາຍ ເນື່ອງຈາກຝົນທີ່ຕົກໜັກ ເຮັດນໍ້າອັ່ງພາຍໃນຕົວເມືອງ ເຊີ່ງຖະໜົນຫົນທາງບໍ່ສາມາດສັນຈອນໄດ້ເປັນປົກກະຕິ ແລະ ເປັນຜົນໃຫ້ການເດີນທາງໄປສະໜາມບິນຊຽງລາຍນັ້ນມີຄວາມຫຍຸ້ງຍາກ. ມີຫຼາຍກວ່າ 9 ຖ້ຽວບິນທີ່ໄດ້ຖືກຍົກເລີກທັ້ງຂາເຂົ້າ ແລະ ຂາອອກ. ຍິ່ງໄປກວ່ານັ້ນ, ບັນດາແຂວງທີ່ຕິດກັບນໍ້າຂອງນັ້ນກໍໄດ້ຮັບຜົນກະທົບຈາກການເພີ່ມຂື້ນຂອງນໍ້າຢ່າງໄວວາ ເປັນຕົ້ນແມ່ນ ເມືອງໜອງຄາຍ.

ໃນຂະນະດຽວກັນ, ທາງກົມອຸຕຸນິຍົມ ແລະ ອຸທົກກະສາດຂອງປະເທດລາວກໍໄດ້ມີການແຈ້ງເຕືອນໃຫ້ເຝົ້າລະວັງຕັ້ງແຕ່ ຊ່ວງຕົ້ນເດືອນກັນຍາທີ່ມາ ເນື່ອງຈາກອິດທິພົນຂອງພາຍຸໄດ້ເຮັດໃຫ້ຝົນຕົກແຮງ ເຊີ່ງບາງທ້ອງຖີ່ນປະສົບກັບນໍ້າຖ້ວມ ແລະ ດິນເຈື່ອນ ໂດຍສະເພາະໃນທາງພາກເໜືອເຊັ່ນ: ແຂວງ ຫຼວງນໍ້າທາ, ຜົ້ງສາລີ, ອຸດົມໄຊ, ແລະ ບໍ່ແກ້ວ. ນອກຈາກນີ້, ບາງຕົວເມືອງໃນເຂດນະຄອນຫຼວງວຽງຈັນໂດຍສະເພາະແມ່ນເຂດໃກ້ແຄມນໍ້າຂອງ ຍັງປະສົບກັບນໍ້າຖ້ວມຂັງ ເນື່ອງຈາກລະດັບແມ່ນໍ້າຂອງເພີ່ມຂື້ນສູງ.

ແຫຼ່ງຂໍ້ມູນອ້າງອີງ: 

• https://www.reuters.com/world/asia-pacific/typhoon-yagi-death-toll-rises-254-vietnam-2024-09-13/ 

• https://www.reuters.com/world/asia-pacific/flooding-thailand-maroons-thousands-northern-province-2024-09-12/ 

• https://www.nationthailand.com/news/general/40041492

• https://www.vientianetimeslao.la/%e0%bb%80%e0%ba%95%e0%ba%b7%e0%ba%ad%e0%ba%99-5-%e0%bb%80%e0%ba%a1%e0%ba%b7%e0%ba%ad%e0%ba%87%e0%ba%a2%e0%ba%b9%e0%bb%88%e0%ba%99%e0%ba%b0%e0%ba%84%e0%ba%ad%e0%ba%99%e0%ba%ab%e0%ba%bc%e0%ba%a7/ 

• https://reliefweb.int/report/lao-peoples-democratic-republic/wfp-lao-pdr-flood-situation-update-16-september-2024

• https://www.ifrc.org/press-release/millions-affected-super-typhoon-yagi-hits-vietnam 

• https://reliefweb.int/report/viet-nam/typhoon-yagi-devastates-southeast-asia-millions-affected 

• https://www.france24.com/en/live-news/20240912-se-asia-battles-floods-landslides-as-death-toll-passes-200

• https://edition.cnn.com/2024/09/13/asia/typhoon-yagi-most-powerful-storm-photos-intl-hnk/index.html 

• https://www.bbc.com/news/articles/cx2kkdpnyp4o

#econewslaos#yagityphoon