ໜຶ່ງໃນສາເຫດທີ່ສຳຄັນຂອງການປ່ຽນແປງດິນຟ້າອາກາດທີ່ໄວວານັ້ນມາຈາກການເພີ່ມຂຶ້ນຂອງອຸນຫະພູມໂລກ ເຊິ່ງໄດ້ກາຍເປັນຕົວເລັ່ງໃຫ້ສຸຂະພາບຈິດປັ່ນປວນ ແລະ ຊຸດໂຊມໜັກຂຶ້ນ ສົ່ງຜົນໃຫ້ອັດຕາຄວາມຮຸນແຮງ ແລະ ການຈົບຊີວິດຕົນເອງມີຕົວເລກສູງຂຶ້ນ. ຈາກການສຶກສາຂອງປະເທດອັງກິດ ແລະ ເວວລ໌ ເມື່ອຊ່ວງປີ 1993 - 2003 ພົບວ່າ ຖ້າຫາກອຸນຫະພູມໃນຊ່ວງເວລາໃດໜື່ງສູງກວ່າ 18 ອົງສາ ແລະ ການເພີ່ມຂຶ້ນໃນທຸກໆ 1 ອົງສານັ້ນມີຄວາມສ່ຽງໃຫ້ອັດຕາການຈົບຊີວິດຕົນເອງເພີ່ມຂຶ້ນເຖິງ 3.8 ສ່ວນຮ້ອຍ. ຍິ່ງໄປກວ່ານັ້ນ, ການຄົ້ນຄວ້າຂອງປະເທດຟິນແລນ ລະຫວ່າງປີ 1996 - 2013 ພົບວ່າ ທຸກໆການເພີ່ມຂື້ນ 1 ອົງສາສົ່ງຜົນໃຫ້ອັດຕາການເກີດອາຊະຍາກຳທົ່ວປະເທດເພີ່ມຂຶ້ນ 1.7 ສ່ວນຮ້ອຍ.
ນອກນີ້, ອຸນຫະພູມທີ່ສູງຂຶ້ນນັ້ນກໍ່ໃຫ້ເກີດຄວາມຜິດປົກກະຕິຂອງການນອນຫຼັບ ເຊິ່ງເຮັດໃຫ້ເກີດອາລົມຫງຸດງິດງ່າຍ, ບໍ່ສາມາດຈັດການອາລົມຕົນເອງໄດ້ ແລະ ອາດຈະນຳໄປສູ່ການໃຊ້ຄວາມຮຸນແຮງໃນທ້າຍທີ່ສຸດ. ພ້ອມດຽວກັນນັ້ນ, ຍັງເຮັດໃຫ້ລະດັບຮໍໂມນເຊໂຣໂທນິນ (serotonin) ທີ່ເຮັດໜ້າທີ່ຄວບຄຸມຄວາມຮູ້ສຶກ, ອາລົມ, ພຶດຕິກຳ ໃນສະໝອງຫຼຸດລົງ ແລະ ໄດ້ກະຕຸ້ນໃຫ້ບັນດາອາການຊຶມເສົ້າ, ວິຕົກກັງວົນ ແລະ ຄວາມຜິດປົກກະຕິທາງດ້ານອາລົມອື່ນໆເກີດຂຶ້ນ
ດ້ວຍເຫດນີ້, ອຸນຫະພູມທີ່ສູງຂຶ້ນຈື່ງບໍ່ໄດ້ສົ່ງຜົນກະທົບຕໍ່ການເຈັບປ່ວຍທາງຮ່າງກາຍພຽງຢ່າງດຽວ ແຕ່ຈິດໃຈກໍໄດ້ຮັບຜົນກະທົບເຊັ່ນດຽວກັນ. ເຖິງແມ່ນວ່າບາງຄັ້ງຮ່າງກາຍຂອງພວກເຮົາອາດຈະບໍ່ໄດ້ສະແດງອາການເຈັບປວດ ແຕ່ຈິດໃຈສາມາດຊີ້ບອກໄດ້ຜ່ານການສະແດງອອກທາງພຶດຕິກຳ. ຖ້າຫາກພວກເຮົາບໍ່ໝັ່ນສັງເກດ ແລະ ເບີ່ງແຍງຈິດໃຈໃຫ້ດີ,ບໍ່ຄ່ອຍໃຫ້ຄວາມສຳຄັນກັບຄວາມຮູ້ສຶກຂອງເຮົາ, ຄວາມສາມາດໃນການປັບຕົວຕໍ່ກັບການປ່ຽນແປງກໍຈະຫຼຸດໜ້ອຍຖອຍລົງ ແລະ ຜົນສຸດທ້າຍຄວາມສ່ຽງຂອງການເກີດບັນດາປາກົດການຫຍໍ້ທໍ້ຕ່າງໆກໍຍິ່ງມີສູງຂຶ້ນ.
ແຫຼ່ງຂໍ້ມູນອ້າງອີງ:
