ໃນຄັ້ງນີ້ມີລາຍງານ ບົດວິໄຈໃຫມ່ຈາກປະເທດ ໂຮນລັງ (ເນເທີແລນ) ທີ່ຖືກເຜີຍແຜ່ໃນເວັບໄຊ້ Science direct ວັນທີ 24 ມີນາ 2022, ເປັນບົດວິໄຈທີ່ໄດ້ຮັບທຶນການສະໜັບສະໜູນຈາກ ອົງກອນຄົ້ນຄວ້າສຸຂະພາບແຫ່ງຊາດຂອງໂຮນລັງ ແລະ ການພັດທະນາ ແລະ ທະເລສາມັນ, ເປັນອົງກອນເພື່ອສັງຄົມທີ່ເຮັດວຽກງານໃນການຫຼຸດຜ່ອນມົນລະພິດປລາສຕິກ. ຈາກການສຶກສາໂດຍເກັບຕົວຢ່າງຈາກອາສາສະໝັກບໍຈາກເລືອດ 22 ຄົນ ທີ່ມີສຸຂະພາບແຂງແຮງດີ, ໃນນັ້ນພົບວ່າມີໄມໂຄຣປລາສຕິກປົນເປື້ອນຢູ່ໃນເລືອດຂອງ 17 ຄົນ ຄິດເປັນ 80% ຂອງຈໍານວນຕົວຢ່າງ; ມີຄວາມເຂັ້ມຂຸ້ນຂອງປະລິມານໄມໂຄຣປລາສຕິກໃນເລືອດຢູ່ທີ່ 16 µg/ml. ບັນດາປະເພດປລາສຕິກກຸ່ມໃຫຍ່ທີ່ພົບເຫັນໃນການທົດລອງຄັ້ງນີ້ປະກອບມີ: ປລາສຕິກ (PET) ປົນເປື້ອນໃນເຄິ່ງໜຶ່ງຂອງຕົວຢ່າງທັງໝົດ ສາມາດພົບໄດ້ໃນຕຸກນໍ້າດື່ມທົ່ວໄປ; 1 ໃນ 3 ຂອງຕົວຢ່າງປົນເປື້ອນ ໂພລີສະໄຕລີນ (PS) ພົບໄດ້ໃນປະເພດກ່ອງອາຫານ, ບ່ວງ, ສ້ອມເປັນຕົ້ນ ແລະ 1 ໃນ 4 ຂອງຕົວຢ່າງປົນເປື້ອນ ໂພລີເອທີລີນ (PE) ທີ່ພົບເຫັນໄດ້ໃນປະເພດຖົງຢາງ ແລະ ບັນຈຸພັນອື່ນໆ. ທ່ານ ສາດສະດາຈານ Dick Vethaak, ນັກພິດວິທະຍາຈາກ Vrije Universiteit Amsterdamໃນປະເທດໂຮນລັງ, ທີ່ເປັນໜຶ່ງໃນທີມນັກວິໄຈຍັງໄດ້ກ່າວວ່າ: “ແນ່ນອນວ່າມັນເປັນເລື່ອງສົມເຫດສົມຜົນທີ່ໜ້າເປັນຫ່ວງ”, “ອະນຸພາກປລາສຕິກນ້ອຍໆເຫຼົ່ານັ້ນກໍາລັງຖືກລຳລຽງທົ່ວຮ່າງກາຍຂອງເຮົາ”, ເພິ່ນຍັງໄດ້ສະແດງ ຜົນງານການວິໄຈທີ່ຜ່ານມາຊີ້ໃຫ້ເຫັນວ່າ ເດັກນ້ອຍນັ້ນມີການປົນເປື້ອນໄມໂຄຣປລາສຕິກໃນອຸດຈາລະຫຼາຍກວ່າຜູ້ໃຫຍ່ເຖິງ 10 ເທົ່າ, ເດັກນ້ອຍຈະໄດ້ຮັບຈາກການກິນນໍ້າໃນຕຸກນົມປລາສຕິກ ເປັນຈໍານວນຫຼາຍລ້ານອັນຕໍ່ມື້. ນັບວ່າເປັນສັນຍານເຕືອນໄພໃຫມ່ທີ່ສະແດງເຖິງຄວາມອັນຕະລາຍຢ່າງຍິ່ງທີ່ມັນສາມາດດູດຊຶມເຖິງລະດັບເລືອດຂອງມະນຸດໄດ້, ມັນເປັນສິ່ງທີ່ສະແດງໃຫ້ເຫັນວ່າວົງຈອນຊີວິດຂອງຄົນເຮົານັ້ນໄດ້ຕິດພັນກັບມົນລະພິດປລາສຕິກຢ່າງໃກ້ຊິດ. ເຮົາຄວນມີວິທີແກ້ໄຂຢ່າງຈິງຈັງຕໍ່ກັບບັນຫາດັ່ງກ່າວ, ເພື່ອບໍ່ໃຫ້ເປັນພາລະໜ້າທີ່ຂອງລູກຫຼານເຮົາໃນອານາຄົດ. ມາຮ່ວມແຮງຮ່ວມໃຈຫຼຸດຜ່ອນ, ຍົກເລີກນໍາໃຊ້ ແລະ ໝູນໃຊ້ຊັບພະຍາກອນໃຫ້ເກີດປະໂຫຍດສູງສຸດ ເພື່ອບໍ່ປ້ອງກັນບັນຫາການຕົກຄ້າງ ແລະ ເພີ່ມຂຶ້ນຂອງປລາສຕິກ. ອ່ານບົດວິໄຈໄດ້ທີ່: https://www.sciencedirect.com/.../pii/S0160412022001258...