ກິດຈະກຳດັ່ງກ່າວແມ່ນໃຫ້ກຽດເປັນປະທານການຈັດງານໂດຍ ທ່ານບົວລີ ແກ້ວມະນີວັນ ຮອງເລຂາພັກເມືອງ ປະທານກວດກາພັກລັດ ເມືອງໄຊທານີ, ທ່ານ ນາງສີດາ ບູນມາ ຄະນະປະຈໍາພັກເມືອງ ຫົວໜ້າຫ້ອງການຄະນະຈັດຕັ້ງເມືອງໄຊທານີ, ທ່ານ ນາງວັນດີ ວົງຄໍາມະນີ ອາດີດຄະນະນໍານະຄອນຫຼວງວຽງຈັນ ທີ່ປຶກສາມູນນິທິສົ່ງເສີມການພັດທະນາຊຸມຊົນ ແລະອະນຸລັກສິ່ງແວດລ້ອມ FCEC Laos - ມສພອ; ພ້ອມດ້ວຍການຈັດຕັ້ງ 12 ບ້ານກຸ່ມ ປກສ ແລະ ການຈັດຕັ້ງ 3 ມ.ສ ໂຮງຮຽນທີ່ຂຶ້ນກັບກຸ່ມດົງບັງພ້ອມຄະນະ, ບໍລິສັດ ອີໂຄນັອກລາວ Econoxlaos, ທີມງານໂຄງການນັກຂ່າວສິ່ງແວດລ້ອມໄວໜຸ່ມ (Econews), ໄອດໍ້ວົງ NG GIRL ແລະ ບັນດານັກຮຽນຈາກໂຮງຮຽນ ມ.ສ ດົງບັງທີ່ໄດ້ຮ່ວມກິດຈະກຳປູກ ຕົ້ນໄມ້ໃນຄັ້ງນີ້.
ທ່ານ ບົວລີ ແກ້ວມະນີວັນ ຮອງເລຂາພັກເມືອງ ປະທານກວດກາພັກລັດ ເມືອງໄຊທານີ ຍັງໄດ້ກ່າວເປີດພິທີ ແລະ ກ່າວຈຸດປະສົງໃນການປູກຕົ້ນໄມ້ໃນຄັ້ງນີ້ວ່າ:1. ເພື່ອທົດແທນຕົ້ນໄມ້ທີ່ພວກເຮົານຳໃຊ້ກໍ່ສ້າງ ແລະ ສູນເສຍໄປ.2. ເພື່ອເປັນການອະນຸລັກຮັກສາສິ່ງແວດລ້ອມ.3. ເພື່ອໃຫ້ພວກເຮົາທຸກຄົນ, ນັກຮຽນນັກສຶກສາ, ຄົນຍຸກໃໝ່ມີຄວາມລຶ້ງເຄີຍໃນການປູກປ່າ, ການຮັກສາສິ່ງແວດລ້ອມ ແລະ ໃຫ້ຮູ້ຄຸນປະໂຫຍດຂອງຕົ້ນໄມ້.
ທ່ານ ນາງວັນດີ ວົງຄໍາມະນີ ອາດີດຄະນະນໍານະຄອນຫຼວງວຽງຈັນ ທີ່ປຶກສາມູນລະນິທິສົ່ງເສີມການພັດທະນາຊຸມຊົນ ແລະອະນຸລັກສິ່ງແວດລ້ອມຍັງໄດ້ໂອ້ລົມ ກ່ຽວກັບຄວາມເປັນມາ ແລະ ອານາຄົດຂອງແຜນໂຄງການ, ທີ່ມີຄວາມພະຍາຍາມຂົນຂວາຍຫາທຶນເພື່ອມາພັດທະນາຊຸມຊົນໃນພື້ນທີ່ຕ່າງໆທົ່ວປະເທດໃຫ້ມີຊີວິດການເປັນຢູ່ດີຂຶ້ນ ແລະ ຮັກສາສິ່ງແວດລ້ອມໄປພ້ອມກັນ.
ນອກນັ້ນ, ເພື່ອເປັນການສ່ົງເສີມຄວາມຮັບຮູ້ໃນການປົກປັກຮັກສາສິ່ງແວດລ້ອມ ທາງທີມງານໂຄງການນັກຂ່າວສິ່ງແວດລ້ອມໄວໜຸ່ມຂອງພວກເຮົາກໍ່ໄດ້ມີການຮ່ວມຈັດກິດຈະກໍາເຜີຍແຜ່ຄວາມຮູ້ກ່ຽວກັບຄວາມໝາຍຄວາມສຳຄັນຂອງປ່າໄມ້, ແລະ ຫຼິ້ນກິດຈະກຳຖາມ-ຕອບໃຫ້ລາງວັນແກ່ນັກຮຽນນັກສຶກສາທີ່ເຂົ້າຮ່ວມງານຢ່າງຟົດຟື້ນ.
ຂ່າວສານໂດຍນັກຂ່າວສິ່ງແວດລ້ອມໄວໜຸ່ມ (Econews Laos)
ຂຽນຂ່າວ: ພູວາວ ຈະເລີນສັກ
ກວດແກ້: ສຸພານິດ ແພງມາລາ
ຖ່າຍພາບ: ຈິລະຢຸດ ນິດວົງໄຂ