ເຫດການການລະເບີດຂອງພູໄຟໃຕ້ທະເລໄດ້ເກີດຂື້ນໃກ້ກັບບໍລິເວນພາກໃຕ້ຂອງເກາະ Iwo Jima ປະມານ 1 ກິໂລແມັດ ໂດຍເມື່ອວັນທີ 21 ເດືອນຕຸລານັ້ນຖືເປັນການລະເບີດຄັ້ງລ່າສຸດ.ຈາກການລະເບີດຂອງພູໄຟດັ່ງກ່າວ, ບັນດາເສດຊາກຂອງການເຜົາໄໝ້ອັນໄດ້ແກ່ຂີ້ເຖົ່າ ແລະ ຫີນຕ່າງໆໄດ້ມີ ການທັບຖົມກັນ ກາຍເປັນເກາະດອນອັນໃໝ່ພົ້ນໜ້ານໍ້າທະເລ.
ການຮວມຕົວຂອງບັນດາເສດຊາກຕ່າງໆເພື່ອປະກອບສ້າງເປັນເກາະນັ້ນໄດ້ໃຊ້ເວລາປະມານ 10 ມື້ ແລະ ໃນຕົ້ນເດືອນພະຈິກ (11) ນີ້ເກາະດັ່ງກ່າວກໍໄດ້ປະກອບສ້າງກາຍເປັນເກາະໃໝ່ທີ່ມີເສັ້ນຜ່າກາງປະມານ 100 ແມັດ (328 ຟຸດ) ແລະສູງເຖິງ 20 ແມັດ (66 ຟຸດ) ເຫນືອໜ້ານ້ຳທະເລ ໂດຍອີງຕາມການລາຍງານຂອງ Yuji Usui, ນັກວິເຄາະຈາກອົງການອຸຕຸນິຍົມແລະພູໄຟຂອງຍີ່ປຸ່ນ.
ການລະເບີດຂອງພູໄຟໃຕ້ທະເລນັ້ນຖືວ່າເປັນປາກົດການທີ່ເກີດຂື້ນໂດຍທົ່ວໄປ ແລະ ການລະເບີດໃນຄັ້ງນີ້ກໍມີລັກສະນະຄ້າຍຄືກັນກັບເຫດການໃນຊຸມປີທີ່ຜ່ານມາ. ແນວໃດກໍຕາມ, ເຫດການໃນຄັ້ງນີ້ໄດ້ສະແດງໃຫ້ເຫັນເຖິງການພັດທະນາຂອງພູໄຟ ເນື່ອງຈາກມັນໄດ້ສ້າງເກາະດອນໃໝ່ຈາກຊາກການລະເບີດຂອງມັນເອງ ແລະ ບັນດານັກວິໄຈກໍຖືໃຫ້ເກາະທີ່ເກີດຈາກການລະເບີດຂອງພູໄຟເປັນໜື່ງເລື່ອງການສຶກສາທີ່ສຳຄັນ ແລະ ໃຫ້ຄວາມໃກ້ຊິດໃນການຕິດຕາມ.
ເຖິງແມ່ນວ່າການລະເບີດໃນຄັ້ງນີ້ໄດ້ກໍ່ໃຫ້ເກີດມີແຜ່ນດິນທີ່ພົ້ນໜ້ານໍ້າທະເລເພີ່ມຂື້ນ, ໃນອີກມຸມມອງໜື່ງທາງນັກຄົ້ນຄວ້າ ແລະ ນັກວິໄຈຂອງຍີ່ປຸ່ນກໍໄດ້ໃຫ້ທັດສະນະວ່າເກາະດັ່ງກ່າວອາດຈະຄົງຕົວຢູ່ໄດ້ບໍ່ດົນເນື່ອງຈາກບັນດາເສດຊາກທີ່ປະກອບສ່ວນໃນການສ້າງຕົວເກາະນັ້ນມີລັກສະນະບໍ່ໝັ້ນຄົງຄືກັບ ບັນດາເກາະທີ່ປະກອບສ້າງຈາກເຮັດລາວາ ຫຼື ຫີນພູໄຟ ເຊີ່ງມີຄວາມສ່ຽງທີ່ເກາະໃໝ່ນັ້ນຈະຖືກຄື້ນຟອງນ້ຳລ້າງອອກໄດ້ຢ່າງງ່າຍດາຍ ແລະ ຈົມລົງໃຕ້ທະເລໃນທີ່ສຸດ. ທັ້ງນີ້ທັ້ງນັ້ນ, ການຄົງຕົວຂອງເກາະຍັງຖືເປັນເລື່ອງທີ່ບໍ່ແນ່ນອນ ແລະ ອາດຈະຕ້ອງໄດ້ຕິດຕາມການຄົງຕົວຂອງເກາະໃນແຕ່ລະໄລຍະ.
ແຫຼ່ງຂໍ້ມູນອ້າງອີງ:
#econewslaos
