ບັນດາຝຸ່ນໝອກເຫຼົ່ານີ້ມີສາເຫດມາຈາກການປ່ອຍມົນລະພິດຈາກທໍ່ຄວັນລົດ, ໂຮງຈັກໂຮງງານອຸດສາຫະກຳ, ການລັກລອບຈູດປ່າເຮັດໄຮ່ຂອງເຂດໃກ້ຄຽງ ແລະ ສົມທົບກັບໃນໄລຍະນີ້ເລີ່ມເຂົ້າສູ່ຊ່ວງລະດູໜາວ ທີ່ບັນດາຄວັນພິດຕ່າງໆລະເຫີຍຍາກ ເຮັດໃຫ້ຝຸ່ນມີການສະສົມຫຼາຍຂຶ້ນ.
ຈາກການລາຍງານຂອງໜ່ວຍງານຄວບຄຸມມົນລະພິດຂອງອິນເດຍ ພົບວ່າ ດັດຊະນີຄຸນນະພາບອາກາດຫຼາຍແຫ່ງໃນອິນເດຍມີຄ່າສູງເກືອບເຖິງລະດັບ 500 ໂດຍເມືອງຫຼວງນິວເດລີ ວັດຄ່າສະເລ່ຍໄດ້ທີ່ 480-500 ເມື່ອວັນທີ 18 ເດືອນພະຈິກ ທີ່ຜ່ານມາ ຕາມການລາຍງານຂອງສຳນັກຂ່າວ Reuters ໂດຍ ລະດັບດັ່ງກ່າວຖືເປັນຂັ້ນວິກິດ ເມື່ອອີງຕາມການອ່ານຄ່າສະພາບຝຸ່ນ ຈາກຄະນະກຳມະການຄວບຄຸມມົນລະພິດຂອງອິນເດຍ (Central Pollution Control Board) ທີ່ໄດ້ກຳນົດວ່າລະດັບຝຸ່ນທີ່ຫຼາຍກວ່າ 401 ຂຶ້ນໄປຈັດວ່າເປັນລະດັບທີ່ “ອັນຕະລາຍ” ແລະ ລະດັບອາກາດທີ່ດີຢູ່ໃນລະດັບ 0-50.
ເພື່ອຫຼຸດຜ່ອນຄວາມສ່ຽງທາງດ້ານສຸຂະພາບຂອງປະຊາຊົນ, ທາງການຂອງອິນເດຍຈຶ່ງໄດ້ມີການຈຳກັດການຂົນສົ່ງຂອງລົດບັນທຸກຂະໜາດໃຫຍ່, ການສັນຈອນດ້ວຍພາຫະນະເກົ່າ, ຢຸດຕິການກໍ່ສ້າງຕ່າງໆ ຕະຫຼອດເຖິງ ພັກການຮຽນແບບເຊິ່ງໜ້າ ແລະ ປ່ຽນແທນດ້ວຍການຮຽນອອນລາຍ ເພື່ອຫຼີກລ່ຽງການອອກນອກບ້ານໃຫ້ໄດ້ຫຼາຍທີ່ສຸດ. ນອກຈາກນີ້, ວິກິດໝອກຄວັນຍັງສົ່ງຜົນກະທົບໃຫ້ ສັນຍາລັກທີ່ສຳຄັນຂອງອິນເດຍກໍຄື “Taj Mahal” ມີທັດສະນີຍາພາບທີ່ເບິ່ງເຫັນໄດ້ຍາກ ເນື່ອງຈາກມີຝຸ່ນໜາປົກຄຸມ. ໃນຂະນະດຽວກັນ, ລົດໄຟທີ່ເດີນທາງເຂົ້າມານະຄອນ ນິວເດລີນັ້ນ ມີລາຍງານວ່າມີຄວາມລ່າຊ້າເຖິງ 22 ຂະບວນ ແລະ ອີກ 9 ຂະບວນນັ້ນຕ້ອງໄດ້ເລື່ອນອອກໄປເນື່ອງຈາກມົນລະພິດທາງອາກາດ.
#econewslaos #airpollution #India #AirPollutioninIndia
ແຫຼ່ງຂໍ້ມູນອ້າງອີງ:
