ເພື່ອຫຼຸດຜ່ອນຄວາມທ້າທ້າຍດັ່ງກ່າວ, ບັນດາພາກສ່ວນຕ່າງໆຈຶ່ງໄດ້ມີການຄິດຄົ້ນຫາວິທີທາງແກ້ໄຂ ເພື່ອ ບັນເທົາຜົນກະທົບໃນດ້ານຕ່າງໆຂອງສັງຄົມ ເຊິ່ງໜຶ່ງໃນນັ້ນແມ່ນໄດ້ເນັ້ນໃສ່ເລື່ອງການລົງທຶນແບບຍືນຍົງ ຫຼື ການລົງທຶນແບບສີຂຽວ ທີ່ຄາດວ່າຈະມີທ່າອ່ຽງທີ່ຈະສ້າງຜົນກະທົບທີ່ດີຕໍ່ກັບສິ່ງແວດລ້ອມ ຄຽງຄູ່ໄປກັບການເພີ່ມພູນຜົນກຳໄລໃຫ້ແກ່ການລົງທຶນນັ້ນໆ.
ແນວໃດກໍຕາມ, ການລົງທຶນແບບຍືນຍົງອາດຈະບໍ່ຍືນຍົງສະເໝີໄປ ເນື່ອງຈາກການລົງທຶນດັ່ງກ່າວອາດຈະຖືກນຳໃຊ້ເປັນພຽງເຄື່ອງມືໃນການຊັກຈູງໃຫ້ນັກລົງທຶນເຂົ້າມາມີສ່ວນຮ່ວມ ແຕ່ຄວາມຈິງອາດຈະບໍ່ໄດ້ສ້າງຄວາມຍືນຍົງ ຫຼື ໃຫ້ຜົນກະທົບທາງບວກແກ່ສັງຄົມ ແລະ ສິ່ງແວດລ້ອມ ເຊິ່ງການລົງທຶນລັກສະນະນີ້ຈະຖືກເອີ້ນວ່າ Impact Washing ຫຼື ການຟອກດ້ວຍຜົນກະທົບ.
ການຟອກດ້ວຍຜົນກະທົບໄດ້ກາຍເປັນເຄື່ອງມືທາງການຕະຫຼາດປະເພດໜຶ່ງທີ່ນຳໃຊ້ເພື່ອດຶງຄວາມສົນໃຈຈາກນັກລົງທຶນ ທີ່ໃຫ້ຄວາມສຳຄັນກັບທຸລະກິດທີ່ສ້າງຜົນກະທົບເຊີງບວກຕໍ່ກັບສິ່ງແວດລ້ອມ ຫຼື ສັງຄົມ ໂດຍຈະມີການໂຄສະນາ ຫຼື ອ້າງຜົນກະທົບຈາກທຸລະກິດຂອງຕົນເກີນຄວາມເປັນຈິງ ເຊິ່ງຜົນກະທົບດັ່ງກ່າວອາດເປັນພຽງການຕົບແຕ່ງ ເພື່ອໃຫ້ທຸລະກິດຂອງຕົນສາມາດຕອບໂຈດກັບຜົນກະທົບທາງບວກ ແລະ ສາມາດສ້າງລາຍໄດ້ ຫຼື ເພີ່ມອັດຕາການລົງທຶນໄດ້ຫຼາຍຂຶ້ນ.
ໃນປີ 2021, ມີການລາຍງານວ່າ 25 ສ່ວນຮ້ອຍຂອງສິນຊັບທົ່ວໂລກໄດ້ຖືກຈັດໃຫ້ສອດຄ່ອງກັບ ສິ່ງແວດລ້ອມ, ສັງຄົມ ແລະ ການຄຸ້ມຄອງ (Environmental, Social, Governance) ໂດຍສິນຊັບດັ່ງກ່າວໄດ້ຮັບກາໝາຍເປັນສິນຊັບສີຂຽວ ຫຼື ສິນຊັບຍືນຍົງ ເຊິ່ງໄດ້ກາຍເປັນສິ່ງດຶງດູດໃຫ້ແກ່ບັນດານັກລົງທຶນທີ່ຄຳນຶງເຖິງຜົນກະທົບທາງບວກ. ທັງນີ້ທັງນັ້ນ, ປະຕິເສດບໍ່ໄດ້ວ່າຍັງມີຊ່ອງຫວ່າງທີ່ເຈົ້າຂອງສິນຊັບສາມາດອ້າງການລົງທຶນຂອງຕົນເປັນການລົງທຶນແບບຍືນຍົງ ແລະ ສາມາດແກ້ໄຂບັນຫາໃນສັງຄົມໄດ້ ເນື່ອງຈາກວ່າການພິຈາລະນາ ຫຼື ການກວດສອບຜົນກະທົບຂອງການລົງທຶນໃດໜື່ງຄ່ອນຂ້າງຈະມີຂະບວນການສັບຊ້ອນ ເມື່ອປຽບທຽບກັບ ການຟອກຂຽວ (Green Washing) ທີ່ເຮົາສາມາດສັງເກດໄດ້ຈາກສິນຄ້າ ແລະ ການດຳເນີນທຸລະກິດວ່າມີຄວາມຍືນຍົງ ຫຼື ບໍ.
“ຄວາມຍືນຍົງ” ກຳລັງກາຍເປັນຊ່ອງວ່າງໃຫ້ພາກສ່ວນທຸລະກິດສວາຍໃຊ້ປະໂຫຍດເພື່ອປຸງແຕ່ງໝາກຜົນຂອງທຸລະກິດນັ້ນໆໃຫ້ແທດເໝາະກັບແນວຄິດດັ່ງກ່າວ ເຊິ່ງໃນປະຈຸບັນມີຫຼາຍໆໂຄງການ ຫຼື ທຸລະກິດ ທີ່ກຳລັງດຳເນີນກິດຈະການສວນທາງກັບການສ້າງຜົນກະທົບທີ່ດີຕໍ່ກັບສະພາບແວດລ້ອມ. ດ້ວຍເຫດນີ້, ການມີມາດຖານການວັດຜົນກະທົບຈຶ່ງເປັນສິ່ງສຳຄັນເພື່ອຮັບປະກັນການສ້າງຜົນກະທົບທີ່ແທ້ຈິງ. ໃນຂະນະດຽວກັນ, ກໍຈະສາມາດຮັບຮູ້ໄດ້ເຖິງຄວາມທ້າທ້າຍ ຫຼື ຜົນກະທົບດ້ານລົບ ທີ່ຕ້ອງໄດ້ຄົ້ນຄວ້າຫາວິທີການໃໝ່ໆເພື່ອຮັບມືກັບສິ່ງດັ່ງກ່າວ.
#econewslaos #impactwashing
