ການລະລາຍຂອງນໍ້າກ້ອນ: ສິລະປະທີ່ສະທ້ອນໃຫ້ເຫັນເຖິງພາວະໂລກເດືອດ. ການປ່ຽນແປງດິນຟ້າອາກາດແມ່ນບັນຫາສິ່ງແວດລ້ອມທີສົ່ງຜົນກະທົບໂດຍກົງຕໍ່ພວກເຮົາ ເຊິ່ງລວມເຖິງການລະລາຍຂອງນໍ້າກ້ອນຂົ້ວໂລກ. ສິລະປະຊິ້ນນີ້ແມ່ນຜົນງານຂອງ Nele Azevedo ສິລະປິນຄົນບຣາຊິວ. ມັນໄດ້ຖືກນໍາໄປຈັດສະແດງໃນພື້ນທີ່ສາທາລະນະໂດຍ ອົງການອະນຸລັກສັດປ່າ (WWF) ປະເທດເຢຍລະມັນ ເພື່ອສະທ້ອນໃຫ້ເຖິງຜົນກະທົບຈາກການປ່ຽນແປງດິນຟ້າອາກາດ.

ການຕໍ່ສູ້ເພື່ອຮັກສາຄວາມຫຼາກຫຼາຍທາງດ້ານຊີວະນາໆພັນ: ຮູບແຕ້ມກໍາແພງໂດຍ Louis Massai ທີ່ສະຖານີລົດເມ Shoreditch Station, ເມືອງ ລອນດອນ ປະເທດອັງກິດ. ມັນໄດ້ບົ່ງບອກໃຫ້ຮູ້ວ່າ ຖ້າເຜິ້ງໄດ້ສູນພັນໄປຈາກໂລກນີ້ ກໍເທົ່າກັບວ່າຄວາມຫຼາກຫຼາຍຂອງຊີວະນາໆພັນກໍສູນເສຍໄປເຊັ່ນດຽວກັນ. ທ່ານສາມາດອ່ານບົດຄວາມກ່ຽວກັບຈໍານວນປະຊາກອນເຜິ້ງໄດ້ທີ່: Bee Diversity

ການຕັດໄມ້ທໍາລາຍປ່າ: ປອດຂອງໂລກພວກເຮົາກໍາລັງຈະຫາຍໄປ. ຜົນງານຂອງ Dr. Love ໃນເມືອງ Bristol, ປະເທດອັງກິດ. ສິລະປະສະແດງເຖິງວ່າປອດຂອງໂລກພວກເຮົາກໍາລັງຈະຫາຍໄປ. ມັນຍັງສະທ້ອນໃຫ້ທຸກຄົນຫັນມາໃຫ້ຄວາມສໍາຄັນຂອງການອະນຸລັກຊັບພະຍາກອນທໍາມະຊາດ ແລະ ການປູກປ່າທົດແທນ.

ການເພີ່ມຂຶ້ນຂອງນໍ້າທະເລ: ລະດັບນໍ້າທະເລທີ່ສູງຂຶ້ນເຊິ່ງເປັນໄພຄຸກຄາມຕໍ່ຊຸມຊົນຕາມແຄມຝັ່ງທົ່ວໂລກ ເຮັດໃຫ້ມີການສູນເສຍດ້ານຊີວິດ ແລະ ຊັບສິນ ແຕ່ບາງຄົນຍັງເຊື່ອວ່າການປ່ຽນແປງດິນຟ້າອາກາດ ແລະ ພາວະໂລກຮ້ອນແມ່ນບໍ່ມີຢູ່ຈິງ. ສະນັ້ນ, Banksy ຈຶ່ງໄດ້ສ້າງສັນຜົນງານນີ້ຂຶ້ນມາເພື່ອສະທ້ອນໃຫ້ເຫັນວ່າພາວະໂລກຮ້ອນແມ່ນມີຢູ່ຈິງ ແລະ ກໍາລັງສົ່ງຜົນກະທົບຕໍ່ໂລກພວກເຮົາ.

ມົນລະພິດຂອງໂລກສະໄໝໃໝ່ຂອງພວກເຮົາ: ມົນລະພິດທາງອາກາດບໍ່ວ່າຈະເປັນ ຝຸ່ນ PM 2.5 ແລະ ຂີ້ເຫຍື້ອປລາສຕິກໃນນໍ້າທີ່ເປັນມົນລະພິດທາງນໍ້າ ລ້ວນແລ້ວແຕ່ແມ່ຝີມືຂອງມະນຸດສ້າງຂຶ້ນ. SaRX ຈຶ່ງໄດ້ສ້າງຜົນງານນີ້ຂຶ້ນມາ ເຊິ່ງສື່ໃຫ້ເຫັນວ່າ ຜົນກະທົບ ຫຼື ມົນລະພິດທີ່ຄົນໃນຮຸ່ນປະຈຸບັນໄດ້ສ້າງຂຶ້ນມາ ແມ່ນຈະສົ່ງຜົນກະທົບຕໍ່ຄົນຮຸ່ນໃໝ່ທີ່ກໍາລັງຈະເຕີບໃຫຍ່.

ການຂະຫຍາຍຕົວຂອງຕົວເມືອງກໍາລັງຂ້າພວກເຮົາ: ການສ້າງມົນລະພິດ, ການຕັດໄມ້ທໍາລາຍປ່າ ແລະ ການນໍາໃຊ້ຊັບພະຍາກອນທໍາມະຊາດເພື່ອຂະຫຍາຍຕົວເມືອງ ສົ່ງຜົນໃຫ້ເກີດການປ່ຽນແປງດິນຟ້າອາກາດ ແລະ ສູນເສຍຄວາມຫຼາກຫຼາຍທາງຊີວະນາໆພັນ ອີກທັງຍັງກໍໃຫ້ມີຂີ້ເຫຍື້ອຈໍານວນມະຫາສານ. ດັ່ງນັ້ນ, Blu ຈຶ່ງໄດ້ສ້າງຜົນງານນີ້ຂຶ້ນເພື່ອບົ່ງບອກໃຫ້ເຫັນເຖິງບັນຫາການຂະຫຍາຍຕົວຂອງຕົວເມືອງ. ວິທີທາງແກ້ໄຂບັນຫານີ້ກໍຄືການວາງແຜນຜັງເມືອງທີ່ຍືນຍົງ ເປັນຕົ້ນແມ່ນເມືອງສີຂຽວ ແລະ ເມືອງອັດສະລິຍະ (smart city) ຈະສາມາດຊ່ວຍຫຼຸດຜ່ອນຜົນກະທົບຈາກການຂະຫຍາຍຕົວເມືອງໄດ້.

ລະດັບນໍ້າທີ່ສູງຂຶ້ນເຊິ່ງມີສາເຫດມາຈາກການປ່ຽນແປງດິນຟ້າອາກາດ: ຜົນງານນີ້ມີຊື່ວ່າ “Support” ຂອງ Lorenzo Quinn, ນັກສິລະປະຄົນອີຕາລີ. ຜົນງານນີ້ສະແດງໃຫ້ເຫັນເຖິງຄວາມຈໍາເປັນໃນການລົງມືປະຕິບັດຢ່າງຮີບດ່ວນເພື່ອຫຼຸດຜ່ອນພາວະໂລກຮ້ອນກ່ອນທີ່ຈະຊ້າເກີນໄປ. ໂດຍຜູ້ສ້າງຜົນງານໄດ້ບອກວ່າ “ເມືອງ Venice ເປັນເມືອງທີ່ອ້ອມຮອບດ້ວຍແມ່ນໍ້າ ແລະ ກໍາລັງໄດ້ຮັບຜົນກະທົບຈາກການປ່ຽນແປງດິນຟ້າອາກາດ. ຖ້າພວກເຮົາຍັງເມີນເສຍ Venice ອາດຈະຈົມຢູ່ໃນນໍ້າ.”

ຄ່ອຍໆຈົມລົງ: ຮູບນີ້ຊື່ວ່າ “Slowly Singking” ຂອງ Isaac Cordal ເປັນຮູບທີ່ມີຄົນໜຶ່ງທີ່ມີຮູບຮ່າງຄ້າຍຄືບຸກຄົນທີມີອໍານາດ ຫຼື ຜູ້ນໍາທາງການເມືອງ ທີ່ກໍາລັງນັ່ງຢູ່ກາງນໍ້າ ເຊິ່ງອ້ອມຮອບໄປດ້ວຍຫຼາຍໆຄົນທີ່ຢູ່ອ້ອມໂຕລາວທີ່ກໍາລັງຈົມຢູ່ໃນນໍ້າ ເຊິ່ງມັນສະແດງໃຫ່ເຫັນວ່າຄົນຜູ້ນັ້ນໄດ້ເມີນຕໍ່ວິກິການ ຫຼື ໄພພິບັດຕ່າງໆທີ່ກໍາລັງເກີດຂື້ນ.