ມາຮອດປີ 2022, ທາງພໍ່ ຄໍາແພງ ມີແນວຄິດຢາກເຮັດສວນແບບຍືນຍົງຂຶ້ນ ເພາະເຫັນສາລີແມ່ນເປັນພຶດລົ້ມລຸກໄດ້ລົງທຶນຕະຫຼອດທຸກໆປີ. ເມື່ອເຫັນວ່າພໍດີມີໂຄງການ ASSEST ຫຼື Agroecology and Safe Food System Transitions ໄດ້ເຂົ້າມາສະໜັບສະໜູນກ່ຽວກັບການທົດລອງ ແລະ ວິທີການໃນການເຮັດນິເວດກະສິກໍາ, ການປູກພຶດແບບປະສົມປະສານກໍຄືການປູກກາເຟ, ແລະ ລ້ຽງເຜິ້ງໃນສວນກ້ວຍ. ກາເຟທີ່ນໍາມາປູກແມ່ນສາຍພັນໂລບັສຕາ (Robusta) ແລະ ຄາດວ່າຈະສາມາດໃຫ້ຜົນຜະລິດໄດ້ພາຍໃນໜຶ່ງ ຫຼື ສອງປີຂ້າງໜ້າ.
ການປູກພືດຫຼາຍຊະນິດ ຫຼື ການກະສິກໍາແບບປະສົມປະສານ ຊ່ວຍໃຫ້ໄດ້ຮັບຜົນຜະລິດ ແລະ ລາຍໄດ້ແບບຕໍ່ເນື່ອງ ເພາະພືດທີ່ນໍາມາປູກແມ່ນໃຫ້ຜົນຜະລິດໃນເວລາທີ່ແຕກຕ່າງກັນເຊັ່ນ: ໃນສວນຂອງພໍ່ ຄໍາແພງ ແມ່ນໄດ້ປູກໝາກເຜັດ ເຊິ່ງເປັນພືດໄລຍະສັ້ນ, ໝາກກ້ວຍ, ໝາກຫຸ່ງ ແລະ ຖົ່ວແຮ ເປັນພືດໄລຍະກາງ, ສ່ວນກາເຟ ແມ່ນໃຫ້ຜົນຜະລິດໄລຍະຍາວ. ນອກຈາກນີ້, ການປູກພືດແບບປະສົມປະສານຍັງຊ່ວຍເພີ່ມຄວາມອຸດົມສົມບູນຂອງດິນ. ພືດແຕ່ລະຊະນິດມີຄວາມຕ້ອງການທາດອາຫານທີ່ແຕກຕ່າງ ແລະ ພືດບາງຊະນິດຍັງກໍສ້າງທາດອາຫານກັບຄືນສູ່ດິນອີກດ້ວຍເຊັ່ນ: ກ້ວຍ ແມ່ນຊ່ວຍໃນການກັກເກັບຮັກສາຄວາມຊຸ່ມຊື່ນຂອງນ້ຳໃນດິນ, ຖົ່ວແຮ ແມ່ນສ້າງທາດອາຫານໄນໂຕຼເຈນ ແລະ ປັບປຸງໂຄງສ້າງຂອງດິນໃຫ້ດີຂຶ້ນ.
ການປູກພືດແບບປະສົມປະສານແມ່ນບໍ່ພຽງແຕ່ຊ່ວຍໃນການຫຼຸດຜ່ອນຕົ້ນທຶນ ແລະ ໃຫ້ຜົນຜະລິດໃນໄລຍະຍາວເທົ່ານັ້ນ ແຕ່ຍັງເປັນແນວທາງທີ່ມີຄວາມຍືດຍຸ່ນຕໍ່ການປ່ຽນແປງດິນຟ້າອາກາດ. ເນື່ອງຈາກເປັນການປະສົມປະສານການປູກພືດ, ການລ້ຽງສັດ ແລະ ປ່າໄມ້ເຂົ້າເປັນລະບົບແບບຍືນຍົງ ທີ່ຊ່ວຍເພີ່ມໃນການປັບໂຕ ແລະ ຫຼຸດຜ່ອນຄວາມສ່ຽງຈາກສະພາບອາກາດທີ່ມີການປ່ຽນແປງ.
