ອາກອນກາກບອນ ຫຼື Carbon Tax ເປັນມາດຕະການຫຼຸດຜ່ອນການປ່ອຍກາສເຮືອນແກ້ວ (Greenhouse gases) ທີ່ລັດນຳໃຊ້ເພື່ອເປັນການຮຽກເກັບນຳບັນດາຫົວໜ່ວຍໂຮງຈັກໂຮງງານທີ່ມີການປ່ອຍມົນລະພິດ ອັນສ້າງຜົນກະທົບໃຫ້ແກ່ສະພາບແວດລ້ອມ ແລະ ມີຜົນກໍ່ໃຫ້ເກີດການປ່ຽນແປງໄລຍະຍາວ ຂອງສິ່ງແວດລ້ອມອ້ອມຂ້າງ. ອາກອນກາກບອນ ຄືເປັນການວັດການປ່ອຍກາກບອນຂອງໂຮງງານ ທີ່ຫາກໂຮງງານໃດປ່ອຍອອກມາຫຼາຍ, ຍິ່ງຕ້ອງໄດ້ຮັບຜິດຊອບຄ່າອາກອນສູງ. ເພື່ອເປັນການຫຼຸດຜ່ອນ ແລະ ປ່ຽນແທນ, ການເກັບອາກອນກາກບອນຈຶ່ງເປັນອີກໜຶ່ງວິທີກະຕຸ້ນໃຫ້ພາກສ່ວນອຸດສາຫະກຳ ແລະ ຫົວໜ່ວຍທຸລະກິດຕ່າງໆຕ້ອງໄດ້ມີການຫາວັດຖຸດິບທົດແທນການນຳໃຊ້ເຊື້ອໄຟເຊັ່ນ: ພະລັງງານທົດແທນຈາກ ລົມ, ແສງແດດ ແລະ ອື່ນໆ, ອັນໄດ້ເຮັດໃຫ້ການຜະລິດມີຄວາມສີຂຽວ ແລະ ເປັນມິດຫຼາຍຂຶ້ນ; ເນື່ອງຈາກອາກອນຊົມໃຊ້ເຊື້ອໄຟຈະຖືກເກັບໃນລາຄາທີ່ສູງຂຶ້ນ ຫຼື ເປັນການຊັກຈູງໃຫ້ມີການຜະລິດໜ້ອຍລົງ ແລະ ສົ່ງເສີມໃຫ້ຜູ້ບໍລິໂພກໄດ້ຫັນໄປຊົມໃຊ້ສິນຄ້າທີ່ມີລາຄາຖືກກວ່າ.
ໃນປັດຈຸບັນ, ຫຼາຍໆປະເທດໃນໂລກໄດ້ມີການນຳໃຊ້ ອາກອນກາກບອນຢ່າງແຜ່ຫຼາຍ, ໂດຍສະເພາະຢ່າງຍິ່ງ ໃນທາງເອີຣົບ ທີ່ມີການໃຫ້ຄວາມສຳຄັນ ແລະ ເອົາໃຈໃສ່ໃນເລື່ອງຂອງສິ່ງແວດລ້ອມຢ່າງໃກ້ຊິດ. ອັດຕາການເກັບອາກອນກາກບອນນັ້ນມີການຈັດເກັບໃນອັດຕາທີ່ແຕກຕ່າງກັນ ອາດຈະເລີ່ມຈາກ 0,08 - 137 USD ຕໍ່ CO2 ໂດຍການເກັບອາກອນດັ່ງກ່າວແມ່ນຈະເກັບຈາກການຜະລິດ ແລະ ຈາກພາກສ່ວນການຊົມໃຊ້-ການບໍລິໂພກ.
ສຳລັບ ສປປ ລາວ, ຜູ້ປະກອບການດ້ານທຸລະກິດອຸດສາຫະກຳ ກໍມີພັນທະໃນການຄວບຄຸມມົນລະພິດ ໂດຍອີງຕາມມາດຕາ 34 ຂອງກົດໝາຍວ່າດ້ວຍການປົກປັກຮັກສາສິ່ງແວດລ້ອມ ໄດ້ລະບຸເຖິງ “ຜູ້ປະກອບການທີ່ດຳເນີນການຜະລິດ, ທຸລະກິດ ແລະ ການບໍລິການ ເຊັ່ນ: ອຸດສາຫະກຳ, ກະສິກຳ, ປ່າໄມ້, ພະລັງງານ, ບໍ່ແຮ່, ຫັດຖະກໍາມີພັນທະຄວບຄຸມມົນລະພິດໃຫ້ຖືກຕ້ອງຕາມມາດຕະຖານຄວບຄຸມມົນລະພິດ ແລະ ມາດຕະຖານຄຸນນະພາບສິ່ງແວດລ້ອມແຫ່ງຊາດ ດ້ວຍການສ້າງແຜນຄຸ້ມຄອງ ແລະ ດຳເນີນການຄວບຄຸມມົນລະພິດ, ສິ່ງລົບກວນ ແລະ ມີພັນທະເສຍອາກອນສິ່ງແວດລ້ອມຕາມລະບຽບກົດໝາຍ.” ຈາກມາດຕາດັ່ງກ່າວ, ອີງຕາມກົດໝາຍວ່າດ້ວຍສ່ວຍສາອາກອນກໍໄດ້ບັນຍັດເຖິງອາກອນສີ່ງແວດລ້ອມ, ໂດຍກຳນົດໃນ ມາດຕາ 58 ທີ່ເວົ້າເຖິງ ອາກອນສິ່ງແວດລ້ອມ ແມ່ນອາກອນທາງກົງ ທີ່ເກັບຈາກບຸກຄົນ, ນິຕິບຸກຄົນ ແລະ ການຈັດຕັ້ງທີ່ໄດ້ຮັບອະນຸຍາດໃນການດຳເນີນທຸລະກິດ ເຊິ່ງມີການເຄື່ອນໄຫວກິດຈະກຳທີ່ກໍ່ມົນລະພິດຕໍ່ສິ່ງແວດລ້ອມ, ສຸຂະພາບ, ຊີວິດຂອງຄົນ, ສັດ, ພືດ ແລະ ຄວາມດຸນດ່ຽງຂອງລະບົບນິເວດ. ພ້ອມດຽວກັນນັ້ນ, ໃນມາດຕາ 59 ກໍໄດ້ກ່າວເຖິງຂອບເຂດຂອງການເກັບອາກອນທີ່ ບຸກຄົນ, ນິຕິບຸກຄົນ, ແລະ ການຈັດຕັ້ງລວມທັງຄົນລາວ, ຕ່າງດ້າວ, ຄົນຕ່າງປະເທດ, ຄົນທີ່ບໍ່ມີສັນຊາດທີ່ໄດ້ຮັບອະນຸຍາດໃຫ້ດຳເນີນທຸລະກິດ ເຊິ່ງກໍ່ໃຫ້ເກີດມີມົນລະພິດຕໍ່ສິ່ງແວດລ້ອມ ລ້ວນແຕ່ຕ້ອງໄດ້ເສຍອາກອນສິ່ງແວດລ້ອມ ແນ່ໃສ່ທຳການບຳບັດ, ດຳເນີນການປົວແປງ ຫຼື ກຳຈັດມົນລະພິດ ແລະ ສິ່ງເສດເຫຼືອໃຫ້ຄືນສູ່ສະພາບທີ່ເໝາະສົມຕໍ່ການດຳລົງຊີວິດທີ່ດີໃນສັງຄົມ.
#econewslaos #carbontax #climatechange #Greenbusiness
ແຫຼ່ງຂໍ້ມູນອ້າງອີງ ແລະ ຂໍ້ມູນເພີ່ມຕື່ມ:
ກົດໝາຍວ່າດ້ວຍການປົກປັກຮັກສາສິ່ງແວດລ້ອມ ສະບັບປັບປຸງ ເລກທີ 29/ສພຊ ປີ 2012
ກົດໝາຍວ່າດ້ວຍສ່ວຍສາອາກອນ ສະບັບປັບປຸງເລກທີ 70/ ສພຊ ປີ2015