ເນື່ອງຈາກໃນປະຈຸບັນ ທາງນະຄອນຫຼວງບາງກອກ ຕ້ອງໄດ້ຮັບພາລະໃນການຈັດການຂີ້ເຫຍື້ອທີ່ເພີ່ມຂຶ້ນໃນແຕ່ລະມື້ຫຼາຍພັນໂຕນ ເຊິ່ງມີຄ່າໃຊ້ຈ່າຍໃນການກຳຈັດປະມານ 2300 ບາດ ຕໍ່ໂຕນ. ດ້ວຍແນວໂນ້ມຂອງຂີ້ເຫຍື້ອທີ່ຄາດວ່າຈະເພີ່ມຂຶ້ນຫຼາຍເທົ່າ, ການສົ່ງເສີມການແຍກຂີ້ເຫຍື້ອຈາກຄົວເຮືອນຈຶ່ງເປັນຕົວຊ່ວຍທີ່ສຳຄັນໃນການຫຼຸດຜ່ອນການຈັດການຂີ້ເຫຍື້ອ.
ສຳລັບຄ່າບໍລິການຈັດເກັບຂີ້ເຫຍື້ອນັ້ນຈະແຕກຕ່າງກັນໄປຕາມຈຳນວນ ເຊິ່ງໄດ້ມີການແບ່ງອອກເປັນ 3 ກຸ່ມຫຼັກ ໄດ້ແກ່: ຂີ້ເຫຍື້ອທີ່ບໍ່ເກີນ 20 ລິດຕໍ່ມື້ (ຄົວເຮືອນ), ຂີ້ເຫຍື້ອທີ່ກາຍ 20 ລິດ ແຕ່ບໍ່ເກີນ 500 ລິດ (ຮ້ານອາຫານຂະໜາດກາງ), ແລະ ຂີ້ເຫຍື້ອທີ່ກາຍ 1000 ລິດຂຶ້ນໄປ. ໂດຍຂີ້ເຫຍື້ອທີ່ບໍ່ເກີນ 20 ລິດ ແມ່ນຈະໄດ້ຊຳລະພຽງແຕ່ 20 ບາດຕາມປົກກະຕິຖ້າຫາກມີການແຍກຂີ້ເຫຍື້ອ. ກົງກັນຂ້າມ, ຫາກບໍ່ມີການແຍກຂີ້ເຫຍື້ອແມ່ນຈະໄດ້ຈັດເກັບໃນລາຄາ 60 ບາດເຊິ່ງໃນນີ້ປະກອບດ້ວຍ 30 ຄ່າຈັດເກັບ ແລະ ອີກ 30 ບາດແມ່ນ ຄ່າກຳຈັດ. ໃນສ່ວນຂອງຂີ້ເຫຍື້ອທີ່ກາຍ 20 ລິດ ແຕ່ບໍ່ເກີນ 500 ລິດ ແມ່ນ ຈະໄດ້ຊຳລະ 120 ບາດ ແລະ ຂີ້ເຫຍື້ອທີ່ກາຍ 1,000 ລິດຂຶ້ນໄປ ແມ່ນຈະໄດ້ຊຳລະ 8,000 ບາດ ເຊິ່ງລວມມີ ຄ່າຈັດເກັບ 3,250 ບາດ ແລະ ຄ່າກຳຈັດແມ່ນ 4,750 ບາດ.
ການຈັດເກັບຄ່າຂີ້ເຫຍື້ອໃນລາຄາໃໝ່ນັ້ນເປັນການສົ່ງເສີມ ແລະ ກະຕຸ້ນໃຫ້ບັນດາຄົວເຮືອນມີຄວາມຕື່ນຕົວ ແລະ ເອົາໃຈໃສ່ໃນການແຍກຂີ້ເຫຍື້ອຫຼາຍຂຶ້ນ ເຊິ່ງແຕ່ລະບ້ານ ແລະ ພາກສ່ວນຕ່າງໆຕ້ອງໄດ້ມີການລົງທະບຽນເຂົ້າຮ່ວມຜ່ານແອັບພລິເຄຊັ່ນຂອງ BKK ແລະ ທາງເຈົ້າໜ້າທີ່ຈະມີການກວດສອບການແຍກຂີ້ເຫຍື້ອ. ຖ້າຫາກພົບວ່າມີການແຍກຂີ້ເຫຍື້ອແທ້, ຄົວເຮືອນດັ່ງກ່າວຈະໄດ້ຊຳລະຄ່າຂີ້ເຫຍື້ອໃນລາຄາປົກກະຕິ.
#econewslaos #wastemanagement
ແຫຼ່ງຂໍ້ມູນອ້າງອີງ:
