ເພື່ອຫຼຸດຜ່ອນຄວາມສ່ຽງຕໍ່ການເພີ່ມຂຶ້ນຂອງຂີ້ເຫຍື້ອອາຫານ, ສິງກະໂປ, ໜື່ງໃນປະເທດທີ່ມີເສດຖະກິດ ແລະ ຕະຫຼາດການບໍລິໂພກຂະໜາດໃຫຍ່, ໄດ້ມີແອັບພຣິເຄຊັ່ນ ນາມວ່າ “Yindii” ທີ່ຜູ້ບໍລິໂພກສາມາດຊື້ອາຫານທີ່ຍັງຂາຍບໍ່ໝົດຂອງມື້ນັ້ນໆໄດ້ໃນລາຄາພິເສດ ເຊິ່ງສາມາດໄດ້ຮັບສ່ວນຫຼຸດສູງສຸດເຖິງ 80 ສ່ວນຮ້ອຍ ໂດຍແອັບດັ່ງກ່າວໄດ້ເປີດຕົວເມື່ອເດືອນສິງຫາ ທີ່ຜ່ານມາ.
Yindii ໄດ້ມີການຮ່ວມມືກັບບັນດາຮ້ານອາຫານ, ຄາເຟ່ ແລະ ຮ້ານ bakery ທີ່ມີຊື່ສຽງໃນສິງກະໂປ ເຊັ່ນ: ຮ້ານ Paul, Baker & Cook ແລະ SaladStop ເພື່ອຈຳໜ່າຍອາຫານທີ່ຍັງຂາຍບໍ່ໝົດໃນລາຄາຍ່ອມເຍົາ. ໂດຍການນຳໃຊ້ແອັບດັ່ງກ່າວ, ລູກຄ້າພຽງແຕ່ສັ່ງຈອງສິນຄ້າແບບ “Surprise Bag” ຫລື ຖົງສິນຄ້າທີ່ມີສິນຄ້າທີ່ເພິ່ນເລືອກມາໃຫ້ ໄວ້ລ່ວງໜ້າ ແລະ ຈະໄດ້ຮັບປະເພດອາຫານທີ່ແຕກຕ່າງກັນ ຂຶ້ນກັບອາຫານທີ່ຂາຍບໍ່ໝົດຂອງທາງຮ້ານໃນແຕ່ລະມື້. ໃນສ່ວນຂອງລາຄາ, ແມ່ນລູກຄ້າຈະໄດ້ຊຳລະໃນຈຳນວນທີ່ຖືກກວ່າລາຄາປົກກະຕິ 50 ເຖິງ 80 ສ່ວນຮ້ອຍ.
ສຳລັບແອັບດັ່ງກ່າວນີ້ ໄດ້ກາຍເປັນໜຶ່ງຊ່ອງທາງທີ່ບໍ່ສະເພາະແຕ່ຊ່ວຍຫຼຸດຜ່ອນຂີ້ເຫຍື້ອຈາກອາຫານ ແຕ່ຍັງຊ່ວຍໃຫ້ຜູ້ບໍລິໂພກສາມາດປະຢັດຄ່າໃຊ້ຈ່າຍສຳລັບຄ່າອາຫານ ແລະ ໄດ້ບໍລິໂພກອາຫານທີ່ມີຄຸນນະພາບໃນເວລາດຽວກັນ. ຍິ່ງໄປກວ່ານັ້ນ, ການຂາຍອາຫານທີ່ຂາຍບໍ່ໝົດນັ້ນໄດ້ຊ່ວຍຊົດເຊີຍການປ່ອຍອາຍກາກບອນຫຼາຍກວ່າ 500 ໂຕນຈົນເຖິງປະຈຸບັນ.
#econewslaos
ແຫຼ່ງຂໍ້ມູນອ້າງອີງ:
